"اصلي هېواد او ضامن هېواد تورکیه به، لکه څنګه چې په تېر کې وه، نن او په راتلونکي کې هم د شمالي قبرس تورکي جمهوریت له ګټو دفاع وکړي او د قبرسي تورکانو د فطري حق، یعنې د حاکمیت د برابرۍ او مساوي نړیوال دریځ د پېژندلو لپاره به په خپله ټوله انرژۍ سره هڅو ته دوام ورکړي."
د تورکیې د بهرنیو چارو وزارت د قبرس د سولې عملیاتو د ۵۲مې کلیزې د ویاړلي لمانځنې په ترڅ کې ویلي چې تورکیه به په راتلونکي کې هم د شمالي قبرس تورکي جمهوریت د ګټو ساتلو او د قبرسي تورکانو د حاکمیت د برابرۍ او نړیوالو مساوي موقفونو د پېژندنې لپاره چې د دوی بنسټیز حق دی، خپلو هڅو ته دوام ورکړي.
وزارت پر خپلې ټولنیزې پاڼې د قبرس د سولې عملیاتو د ۵۲مې کلیزې په اړه یو پیغام خپور کړی دی.
په دغه پیغام کې ویل شوي: "موږ د قبرس د سولې عملیاتو ۵۲مه کلیزه، چې د قبرسي تورکي ولس د ازادۍ د مبارزې د بریا نښه ده، په ویاړ سره لمانځو. پوره ۵۲ کاله وړاندې تورکیې د ۱۹۶۰ کال د تضمین د تړون پر بنسټ د خپلو حقونو او مسؤلیتونو په چوکاټ کې اقدام وکړ او په دې سره یې د قبرسي تورکانو ژوند او په ټاپو کې د هغوی شتون تضمین کړ."
په دغه پیغام کې پر دې ټینګار شوی چې نن د قبرس تورکي ولس د شمالي قبرس تورکي جمهوریت تر چتر لاندې، د خپل ازاد رپېدونکي بیرغ لاندې په ویاړ، سوله او امنیت کې ژوند کوي: "اصلي هېواد او ضامن هېواد تورکیه به، لکه څنګه چې په تېر کې وه، نن او په راتلونکي کې هم د شمالي قبرس تورکي جمهوریت له ګټو دفاع وکړي او د قبرسي تورکانو د بنسټیز حق یعنې د حاکمیت برابري او مساوي نړیوال موقف د رسمي پېژندنې لپاره به په ټول توان سره کار وکړي. موږ هغو 'محمدچیکانو' (تورکي سرتیرو) او مجاهدینو ته چې په قبرس کې یې سوله ټینګه کړه او زموږ د ملي داعیې په لاره کې یې د شهادت مقام ترلاسه کړ، د خدای له درباره د رحمت غوښتنه کوو او خپلو غازیانو ته د مننې او درناوي مراتب وړاندې کوو."
