د پاکستان پر پوځي کالج برید کوونکي ټول پنځه واړه بریدګر ووژل شول
یو امنیتي چارواکي د چهارشنبې په ورځ وویل، پاکستاني ځواکونو د دغه هیواد په شمال لویدیځ کې پر یوه پوځي کالج له برید وروسته د یوه ځانمرګي بریدګر په ګډون ټول پنځه واړه وسله وال ووژل.
دغه چارواکي له رسنیو سره د خبرو د محدودیتونو له امله د نوم نه ښودلو په شرط انادولو خبري اژانس ته وویل، امنیتي عملیات پای ته رسېدلي او چارواکي اوس د کالج ودانۍ د هر ډول احتمالي ګواښ د له منځه وړلو لپاره پاکوي.
د دوشنبې په ورځ، د پاکستان د جنوبي وزیرستان په وانا کې پر کیډټ کالج هغه مهال برید وشو چې وسله والو له چاودېدونکو توکو ډک موټر د کالج له اصلي دروازې سره وجنګاوه.
د یوه ځانمرګي بریدګر په ګډون دوه وسله وال په لویه دروازه کې ووژل شول او درې نور د کالج مرکز ته ننوتل.
دغه چارواکي وویل، امنیتي ځواکونو د زده کوونکو، ښوونکو او ملکي کارکوونکو په ګډون تر ۶۰۰ ډېر کسان چې په مرکز کې دننه وو، ژغورلي او وروسته یې د هغو وسله والو پر ضد عملیات کړي چې د کالج په اداري بلاک کې کلابند شوي وو.
امنیتي چارواکي وویل، وسله والو هڅه کوله د ۲۰۱۴ کال د پېښور د ښوونځي برید تکرار کړي، خو امنیتي ځواکونو د تراژیدۍ مخه ونیوله.
د ۲۰۱۴ کال د ډسمبر په ۱۶مه، شپږو طالب ترهګرو د خیبر پښتونخوا ایالت په مرکز پېښور کې پر ارمي پبلک سکول برید وکړ او د څه باندې ۱۳۰ زده کوونکو په ګډون یې نږدې ۱۵۰ کسان ووژل.
د برید مسوولیت د تحریک طالبان پاکستان خلیفه منصور ډلې منلی و. خلیفه منصور وروسته د ۲۰۱۷ کال په اکتوبر میاشت کې د افغانستان په ختیځ کې د امریکا د بې پیلوټه الوتکې په برید کې ووژل شو.
