د چین ولسمشر شي جین پینګ ویلي چې چارواکي باید دا پېښه په بشپړه توګه وڅېړي او د هغې عواقب په سمه توګه مدیریت کړي.
دولتي رسنیو خبر ورکړی چې د چین په یوه مرکزي ولایت کې د پټاقیو جوړولو په یوه فابریکه کې چاودنې لږ تر لږه ۲۱ کسان وژلي او ۶۱ نور یې ټپیان کړي دي.
د چین رسمي خبري اژانس، شینهوا د سه شنبې په ورځ وویل چې دا چاودنه د دوشنبې په ماسپښین د هونان ولایت په چنګشا ښار کې د پټاقیو په یوه فابریکه کې شوې ده.
سیمې ته نږدې ۵۰۰ ژغورونکي استول شوي او په خطرناکو ساحو کې د خلکو د ایستلو (تخلیې) عملیات ترسره شوي دي. چارواکي دا مهال د چاودنې د لامل په اړه څېړنې کوي.
د شینهوا د راپور له مخې، ولسمشر شي جین پینګ د لادرکه شویو کسانو د لټون او د ټپیانو د ژغورلو لپاره د جدي هڅو لارښوونه کړې ده. هغه همدارنګه غوښتنه وکړه چې د پېښې زیانونو ته دې په مناسبه توګه رسیدګي وشي او د پېښې په اړه دې دقیقې پلټنې وشي.
په چین کې صنعتي پېښې، په ځانګړې توګه د پټاقیو په صنعت کې، ډېرې عامې دي.
تېر کال هم په هونان ولایت کې د پټاقیو په یوه بله فابریکه کې چاودنې ۹ کسان ووژل، او په ۲۰۲۳ کال کې د تیانجین په شمالي ښار کې په استوګنیزو ودانیو کې د چاودنو له امله ۳ کسان ووژل شول. د سږ کال د فبرورۍ په میاشت کې هم د هوبي او جیانګ سو په ولایتونو کې د پټاقیو په پلورنځیو کې د جلا جلا چاودنو له امله ۱۲ او ۸ کسان وژل شوي وو.
