د تورکیې د همکارۍ او همغږۍ ادارې (ټیکا)، په افغانستان کې د ۳۰۰ ټنه په ظرفیت سړه خونه جوړه کړه
د تورکیې د همکارۍ او همغږۍ ادارې (ټیکا)، په افغانستان کې د کرنې سکتور د ملاتړ په موخه د ۳۰۰ ټنه په ظرفیت یوه عصري سړه خونه جوړه کړه.
د ټیکا له خوا د یوې خپرې شوې خبرپاڼې له مخې، د افغانستان په پکتیا ولایت کې د ۳۰۰ ټنه په ظرفیت د یوې عصري سړې خونې د پرانیستې مراسم ترسره شول.
په مراسمو کې د افغانستان د کرنې، اوبولګولو او مالدارۍ مرستیال وزیر صدر اعظم عثماني، د پکتیا مرستیال والي مولوي انعام الله صلاح الدین، د پکتیا د کرنې رئیس امین هاشمي، د ټیکا د کابل دفتر همغږي کوونکي فاضل اکین اردوغان او بزګرانو ګډون کړی و.
مرستیال وزیر عثماني دلته په خپلو خبرو کې د کرنې په برخه کې د ټیکا د فعالیتونو پر اهمیت ټینګار وکړ او اعلان یې وکړ چې ډېر ژر به د غوړینو تخمونو په برخه کې هم له تورکیې سره همکاري وشي.
د پکتیا د کرنې رییس هاشمي هم له ټیکا څخه مننه وکړه او ټینګار یې وکړ چې دا پروژه به د کرنې سکتور پیاوړی کړي.
مرستیال والي انعام الله صلاح الدین وویل چې د دا ډول پروژو له لارې د تورکیې او افغانستان ترمنځ د ورورګلوۍ اړیکې لا پسې پیاوړې کېږي.
د ټیکا د کابل همغږي کوونکي اردوغان وویل چې د افغانستان د خلکو لویه برخه خپل ژوند د کرنې او مالدارۍ له لارې تېروي او زیاته یې کړه چې په پرمختیايي پروژو کې دې برخو ته لومړیتوب ورکول کېږي.
د اوږدې مودې راهیسې د زېرمهځایونو د زیربنا د نشتوالي له امله، بزګرانو نه شوای کولای خپل محصولات په مناسبو شرایطو کې وساتي، چې دا چاره هم د محصولاتو د ډېر ضایع کېدو او هم د عایداتو د کمښت لامل کېده. د ټیکا له خوا پلې شوې د سړې خونې دا پروژه په سیمه کې د دې ستونزې لپاره لومړنی معیاري حل دی.
دا زېرمتون، چې په عصري ټکنالوژۍ سمبال دی، د مڼو په ګډون د مېوو او سبزیجاتو غذایي ارزښت به د اوږدې مودې لپاره وساتي او بازار ته د وړاندې کولو زمینه به برابره کړي. په دې توګه به تولیدوونکي وکولای شي خپل محصولات په پراخو بازارونو او رقابتي نرخونو وپلوري.
