د مصر د استخباراتو مشر په اسرائيل کې د غزې د اوربند د پلي کولو په اړه د خبرو اترو دمخه له نتنیاهو سره وکتل
دا د ۲۰۲۳ کال د اکتوبر راهیسې اسرائيل ته د مصر د یو لوړ پوړي چارواکي لومړی سفر دی.
د مصر د استخباراتو مشر حسن رشاد اسرائيلو ته رسېدلی، څو له اسرائيلي چارواکو سره د غزې د اوربند د پلي کېدو په اړه خبرې وکړي.
د اسرائيلو دولتي راډيو کان د سه شنبې په ورځ راپور ورکړ چې رشاد د اسرائيلو له لومړي وزیر بنیامین نتنیاهو سره د اوربند د هوکړې د پلي کولو پر جزئیاتو خبرې کړې دي.
د مصر دولتي ټلویزیون القاهره نیوز (Al-Qahera News) وویل چې رشاد به په خپلو خبرو کې غزې ته د بشري مرستو د ننوتلو موضوع هم مطرح کړي.
د مصر د استخباراتو مشر به د سفر پر مهال د منځني ختیځ لپاره د امریکا له ځانګړي استازي سټیف وټکوف (Steve Witkoff) سره هم وګوري.
دا سفر له اکتوبر ۲۰۲۳ کال راهیسې اسرائيلو ته د یوه لوړپوړي مصري چارواکي لومړنی سفر دی، هغه مهال چې تل ابيب پر غزه خپله نسل وژونکې جګړه پيل کړه.
د اوربند تړون د اکتوبر په ۱۰مه په غزه کې نافذ شو، چې د امريکا د ولسمشر ډونالډ ټرمپ لخوا وړاندې شوې مرحلېزې طرحې پر بنسټ ولاړه ده، چې د تورکیې، قطر او مصر لخوا يې هم ملاتړ وشو. د لومړۍ مرحلې له مخې د اسرائيلي بنديانو د خوشې کولو په بدل کې فلسطيني بندیان ازاد شول.
دغه طرحه همدارنګه د غزې د بيا رغونې او د حماس پرته د يو نوي اداري جوړښت د رامنځته کولو وړاندوينه کوي
