د ایران د بهرنیو چارو وزیر عباس عراقچي د ملګرو ملتونو د ۸۱مې عمومي غونډې په څنډه کې په نیویارک کې خبریالانو ته د خبرو پر مهال، وویل چې که امریکا د قطر له لارې ورته رسول شوې طرحه ومني، نو تهران کولای شي د هرمز تنګی په اوو ورځو کې بيا پرانیزي.

عراقچي خبریالانو ته وویل چې د اوو ورځو مهالوېش به د واشنګټن لخوا د وړاندیز له منلو سره سم پیل شي.

هغه وویل چې له واشنګټن څخه تمه کېږي چې د لومړیو څلورو یا پنځو ورځو په ترڅ کې ځینې ګامونه پورته کړي، ترڅو په شپږمه ورځ تنګی بیا پرانیستل شي.

هغه زیاته کړه چې د وروستي موافقې په اړه د تهران او واشنګټن ترمنځ خبرې به بیا په اوومه ورځ پیل شي.

د بهرنیو چارو وزیر وویل چې له واشنګټن څخه غوښتل شوي تدابیر مخکې په جون میاشت کې په اسلام آباد کې لاسلیک شوي د پوهاوي یادداشت (موافقت لیک) کې ځای پر ځای شوي وو.

هغه وویل: "که د امریکا په لوري کې د موافقې ته د رسیدو او د هرمز تنګي د بیا پرانیستو لپاره جديت شتون ولري، نو اوس هر څه چمتو دي."

عراقچي وویل چې ایران د تنګي له لارې خوندي تګ راتګ ته ژمن دی، خو پر واشنګټن یې تور ولګاوه چې د وروستیو پوځي اقدام له لارې یې د موافقې د پلي کېدو مخه ډال کړې ده.

هغه وویل چې تهران لا هم ډیپلوماسۍ ته پرانیستې دروازه لري، خو غواړي چې د خبرو اترو بل پړاو ته له ننوتلو مخکې د امریکا د نویو بریدونو پر وړاندې معتبر تضمینونه تر لاسه کړي.

مثبتې او رغنده خبرې اترې

سپینې ماڼۍ وویل چې د امریکا چارواکي د ایران د جګړې په اړه د منځګړو سره مثبتې او رغنده خبرې اترې لري.

د پوښتنو په ځواب کې، سپینې ماڼۍ وویل چې امریکا د هرمز تنګي له لارې د پام وړ پټرول (تیلو) صادرات اسانه کوي.

دا وړاندیز چې د قطر له لارې امریکا ته رسول شوی، په جون میاشت کې د ترلاسه شوي لنډمهاله موافقې سره ورته دی، مګر د چټک مهالوېش سره.

د ډیپلوماتیکو خوځښتونو په وروستۍ نښه کې، پزشکیان د جمعې په سهار د قطر لومړی وزیر شیخ محمد بن عبدالرحمن آل ثاني په خپله کوربتوب کې ومانه.

له دې وړاندې، د امریکا د بهرنیو چارو وزیر مارکو روبیو ویلي وو: "که د نظرونو او پیغامونو د تبادلې لپاره کومه موقع وي، موږ به یې وکړو."