د سویلي کوریا پوځ ادعا کړې ده شمالي کوریا سږ کال روسیې ته ۳,۰۰۰ نور سرتیري استولي دي او لا هم توغندي، توپچي مهمات او پوځي تجهیزات مسکو ته د کیف پر وړاندې جګړه کې د مرستې لپاره ورکوي.

د سویلي کوریا د ګډو ځواکونو د مشرانو په وینا، "شمالي کوریا  د جنورۍ او فبرورۍ ترمنځ ۳,۰۰۰ نور سرتیري د تقویې په توګه  روسیې ته استولي دي." د دوی په وینا، د لومړیو ۱۱,۰۰۰ شمالي کوریايي سرتیرو څخه چې روسیې ته استول شوي وو، ۴,۰۰۰ یې وژل شوي یا ټپیان شوي دي.

د راپور له مخې، "د بشري ځواک سربېره، شمالي کوریا لا هم توغندي، توپچي مهمات او  تجهیزات  ورکوي." د سویلي کوریا د ګډو ځواکونو راپور زیاتوي چې "تر دې دمه ارزونه شوې چې شمالي کوریا د لنډ واټن بالستیک توغندیو (SRBMs) یوه لویه اندازه، او همدارنګه ۲۲۰ د ۱۷۰ ملي متري ځان چلوونکي توپونه او ۲۴۰ ملي متري څوګوني راکټ لانچرونه ورکړي دي."

راپور خبرداری ورکړی چې "دا شمېرې د جګړې په ډګر کې د وضعیت په بدلیدو سره زیاتېدای شي."

بریدګر ډرونونه

د روسیې او شمالي کوریا دودیز متحدین د مسکو د ۲۰۲۲ کال د اوکراین پر وړاندې برید وروسته یو بل ته نږدې شوي دي، چې د سویلي کوریا په وینا، د شمالي کوریا مشر کیم جونګ اون زرګونه سرتیري او د وسلو نه ډک  کانټینرونه د مسکو د مرستې لپاره استولي دي.

تر اوسه نه روسیې او نه هم شمالي کوریا  د سرتیرو استول په رسمي ډول تایید کړي ندي، خو دواړو هیوادونو تېر کال یو پراخ پوځي تړون لاسلیک کړ، چې د متقابل دفاع ماده هم پکې شامله وه، کله چې د روسیې ولسمشر ولادیمیر پوتین شمالي کوریا ته یوه نادره سفر وکړ.

د شمالي کوریا دولتي رسنیو د پنجشنبې په ورځ راپور ورکړ چې کیم د مصنوعي استخباراتو ټکنالوژۍ لرونکي نوي ځان وژونکي او څارونکي ډرونونو ازموینه څارلې ده.

د کوریا مرکزي خبري اژانس (KCNA) ویلي، نوی ستراتیژیک څارونکی ډرون د دې وړتیا لري چې "بیلابیل ستراتیژیک اهداف او د دښمن ځواکونو فعالیتونه په ځمکه او سمندر کې تعقیب او وڅاري." د ځان وژونکي ډرونونو د برید وړتیا هم وښودل شوه چې "د مختلفو تاکتیکي بریدونو لپاره کارول کېدای شي."

کیم د ستراتیژیک څارونکي ډرون او ځان وژونکي برید ډرونونو د پرمختللې کړنې ارزونه وکړه او د "نوې مصنوعي استخباراتو د معرفۍ" سره یې د تولید ظرفیت د پراختیا لپاره د یوې طرحې سره موافقه وکړه.