د تورکیې ولسمشر رجب طیب اردوغان د چهارشنبې په ورځ وویل چې په سیمه کې یو حساس پړاو پیل شوی دی او زیاته یې کړه چې اسرائیل حتی د سولې له کوچني احتمال سره هم مخالفت کوي. اردوغان د تورکیې په پارلمان کې خپل ګوند (عدالت او پراختیا) ته په وینا کې وویل: "موږ پوهیږو چې اسرائیل حتی د سولې لږ احتمال هم نشي زغملی."
د سیمې د وروستیو حالاتو په اړه اردوغان وویل چې په تیرو لسو ورځو کې د اسرائیلي سیاستوالو څرګندونې ښیي چې "موږ د یو عاقل دولت پر ځای، د یوې داسې افراطي ډلې سره مخ یو چې کنټرول یې له لاسه ورکړی دی." هغه زیاته کړه: "وضعیت دومره خراب دی چې هر یو پر بل تور لګوي چې ولې یې لږ خلک وژلي او لږه وینه یې تویې کړې ده."
اردوغان وویل چې په اسرائیل کې ځینې ډلې نه غواړي په سیمه کې وسلې غلې شي او هڅه کوي هغه وروستۍ هوکړه چې د پراخو ډیپلوماټیکو هڅو په پایله کې ترلاسه شوې، له منځه یوسي. هغه اسرائیل د "قتل عام یوه شبکه" وبلله او ویې ویل چې د تیرو لسو ورځو په جریان کې یې د ټولو خواوو په سختۍ ترلاسه شوې هوکړه (اجماع) د ګډوډولو لپاره هر څه کړي دي.
هغه زیاته کړه: "که زموږ سیمې ته سوله راځي، نو د اسرائیلو له شتون سره سره به راځي. که په سیمه کې آرامي غواړو، دا به د اسرائیلو د پاروونکو اقداماتو سره سره وي. د قتل عام دا شبکه چې هر څه وکړي، ونشي کولی په سیمه کې د سولې، عدالت، ثبات او سوکالۍ د بریا مخه ونیسي."
اردوغان وویل چې ترکیه به د سولې د هر فرصت لپاره د خپلو ډیپلوماټیکو هڅو ملاتړ ته دوام ورکړي: "د تورکیې په توګه به موږ د سولې د کوچني چانس کارولو لپاره له هیڅ ډول هڅو څخه ډډه ونه کړو." هغه دا هم وویل چې انقره به په راتلونکي وخت کې د ایران په اړه د بحران د دایمي حل لپاره د هڅو ملاتړ ته دوام ورکړي.
د یادونې وړ ده چې امریکا او ایران د جون په ۱۸مه یو تفاهم لیک لاسلیک کړ او د یکشنبې په ورځ په سویس کې د پاکستان او قطر په منځګړیتوب خبرې پیل شوې، ترڅو هغه جګړه پای ته ورسوي چې د فبروري په ۲۸مه د امریکا او اسرائیلو لخوا د ایران په وړاندې پیل شوې وه. که څه هم د امریکا او ایران تفاهم لیک په ټولو جبهو (د لبنان په ګډون) کې د جګړې پر درولو ټینګار کړی، خو اسرائیلو په لبنان باندې خپلو بریدونو ته دوام ورکړی دی.
