د کولمبیا ولسمشر پیټرو د غزې پر لور د مرستو پر کاروان د برید له امله اسرائیلي دیپلوماتان وشړل

د کولمبیا ولسمشر ګوستاوو پیټرو له کولمبیا څخه د اسرائیلو د ټول دیپلوماتیک پلاوي د شړلو امر کړی، دا اقدام په هغه کاروان کې د دوو کولمبیایي وګړو د نیول کېدو له امله شوی چې کلابندې غزې ته یې د بشري مرستو د رسولو هڅه کوله.

مانویلا بیدویا او لونا باریتو د "ګلوبل صمود" په نوم د بېړیو د کاروان د عملې غړې وو- دا یوه نړیواله هڅه ده چې غواړي د اسرائیلو کلابندي ماته او غزې ته مرستې ورسوي. غزې ته د نړیوال غورځنګ د یوې اعلامیې له مخې، اسرائیلي پوځ دا مېرمنې وروسته له هغه په غیرقانوني توګه ونیولې چې کاروان له ساحل څخه ۱۵۰ سمندري میله لرې د لوړ خطر یوې سیمې ته ورسېد.

په اعلامیه کې راغلي: "له ۱۵۰ سمندري مایلونو واټن ته تر رسېدو وروسته اسرائیلي بېړیو د شپې په ۱۱ بجو او ۵۹ دقیقو برید  پیل کړ." اعلامیې زیاته کړې چې پر نورو ورته کاروانونو هم "بریدونه شوي یا یې مخه نیول شوې ده." دا کار "د نړیوال قانون او د جنیوا تړونونو سرغړونه" بلل شوې ده.

پیټرو پر اېکس (پخواني ټویټر) خبرداری ورکړ چې که دا راپورونه ریښتیا وي، نو دا به "د بنیامین نتنیاهو له خوا یو نوی نړیوال جنایت" وي. هغه وویل چې "له اسرائیلو سره د ازاد تجارت تړون سمدستي لغوه کیږي." د روانې اونۍ په پیل کې، پیټرو له اسرائیلو سره د دې تړون د ځنډولو غوښتنه کړې وه.

که څه هم پیټرو د ۲۰۲۴ کال په مې میاشت کې له اسرائیلو سره دیپلوماتیکې اړیکې شلولې وې، خو په نوې اعلامیه کې یې یو ګام نور هم وړاندې لاړ او ټولو پاتې دیپلوماتیکو استازو ته یې امر وکړ چې سمدستي د کولمبیا له خاورې ووځي.

هغه اشاره وکړه چې د بهرنیو چارو وزارت به د اسرائیلو پر خلاف  په محکمو کې هم قانوني دعوې ثبت کړي، او له نړیوالو وکیلانو یې وغوښتل چې د کولمبیا له حقوقي ټیم سره مرسته وکړي.