د تورکیې د همکارۍ او همغږۍ اداره (ټیکا) په افغانستان کې د خپلو پروژو له لارې د زده کړو ترڅنګ د کارموندنې او تولید پیاوړتیا ته هم زمینه برابروي.
د ټیکا لخوا په خپره شوې خبرپاڼه کې راغلي، چې د افغانستان په تخار ولایت کې د ینګي قلعه ولسوالۍ اړوند د موغلان کلي لېسې لپاره نوې جوړه شوې ودانۍ د یو لړ مراسمو په ترڅ کې ګټې اخیستنې ته وسپارل شوه.
د پرانیستې په مراسمو کې د ټیکا ادارې مرستیال امید ناجي یورولماز، د تخار والي مولوي سمیع الله حزب الله او د ټیکا د مزارشریف همغږي کوونکي میکایل تاش دمیر ګډون کړی وو.
یورولماز په خپله وینا کې وویل چې افغانستان د تورکیې لپاره ځانګړی ځای لري او زیاته یې کړه چې په دغه هېواد کې له ۱۹۹۷ کال راهیسې پرمختیايي پروژې پلې کوي او په کابل، مزارشریف او هرات کې د ۳ فعالو دفترونو له لارې په ډګر کې پیاوړی حضور لري.
یورولماز وویل، ټیکا په ټول افغانستان کې شاوخوا ۱۹۰۰ پروژې پلې کړي چې نږدې ۷۰۰ یې د هېواد په شمال کې بشپړې شوې دي. هغه همدارنګه زیاته کړه چې په افغانستان کې د مولانا جلال الدین رومي د پلار، بهاالدین ولد د مدرسې د بیارغونې چارې هم دوام لري.
یورولماز دې ته په اشارې سره چې د افغانستان په شمال کې یې د ۵۲ ښوونځیو اړوند پروژې بشپړې کړې دي، ټینګار وکړ چې په دې سیمه کې ۶۲۰ درسي ټولګي جوړ شوي او ۳۰ زره زده کوونکو ته د زده کړو عصري چاپېریال برابر شوی دی.
د تخار والي حزب الله هم له ترکیې او د هغه هېواد له خلکو څخه مننه وکړه او ویې ویل، د ټیکا لخوا حتی په لرې پرتو سیمو کې د پوهنې په برخه کې پانګونه د افغانانو لپاره د لویې خوښۍ ځای دی.
د ټیکا د مزارشریف همغږي کوونکي تاش دمیر هم د پروژې د محتوا په اړه معلومات ورکړل او ویې ویل، چې د ښوونځي ټولې ګډې برخې له سره رغول شوې دي.
د موغلان کلي په لېسه کې، چې ۸ درسي ټولګي، ۳ اداري خونې او ۲ کتابتونونه لري، هره ورځ به په دوو شفټونو کې ۱۵۰۰ زده کوونکو ته د زده کړو زمینه برابرېږي.
په دغه ښوونځي کې، چې د ټیکا لخوا سمبال شوی، کمپیوټرونه، پروجکتورونه، درسي او اداري فرنیچر او دوه کوچني کتابتونونه هم جوړ شوي دي.
د پرانیستې په مراسمو کې پر ټولو زده کوونکو د ښوونځي بکسونه او قرطاسیه هم ووېشل شول.
