سیمه ییزو رسنیو او چارواکو د شنبې پر ورځ وویل، د شپې لخوا د بلغاریا په مرکزي برخه کې د وسلو د ساتنې په یوه ډیپو کې چاودنې اور لګیدنه رامنځته شوې ده؛ دا په تېرو څو اونیو کې د مهماتو په یوه تاسیسات کې دویمه اورلګېدنه ده.
په دغې اورلګېدنه کې چې د څاریوا لیوادا کلي ته نږدې رامنځته شوې او په سیمه ییزه کچه خپرو شویو ویډیوګانو کې د شپې اسمان روښانه کړی وو، د چا د ټپي کېدو راپور نه دی ورکړل شوی.
د ګابرووو سیمه ییزې والې، کریستینا سیدورووا د شنبې په لومړیو ساعتونو کې خبریالانو ته وویل: «اوس مهال اورلګیدنه د فابریکې د ذخیره کولو د اډې په ساحه کې روانه ده؛ دا له یوه ډیپو څخه بل ډیپو ته د اور د لمبو د خوریدو په نتیجه کې رامنځته شوې ده.»
سیمه ییزو رسنیو د امکو (EMCO) کمپنۍ د یوه چارواکي له قوله راپور ورکړی چې اور په هغې سیمه کې لګېدلی چې د EMCO شرکت لخوا اداره کېږي؛ دغه شرکت تېره میاشت هم په بل تاسیسات کې د چاودنې شاهد و.
دا شرکت د بلغاریایي وسلو سوداګر، امیلیان ګبریو لخوا اداره کېږي؛ بلغاریایي څارنوالان ادعا کوي چې نوموړی او د هغه تاسیسات په تېرو وختونو کې د روسي ایجنټانو د بریدونو هدف و.
په ۲۰۲۴ کال کې بلغاریا د شپږو روسي اتباعو د نیولو حکم صادر کړ، چې له ۲۰۱۱ څخه تر ۲۰۲۰ پورې اوکراین او ګرجستان ته د صادریدونکو مهماتو د ډیپوګانو په ویجاړولو کې لاس درلود .
په هغه وخت کې څارنوالانو ویلي وو چې دوی کولی شي له موثقو شواهدو سره د بلغاریا د چاودنو، په ۲۰۱۵ کال کې د ګبریو د مسمومولو د هڅې، او په ۲۰۱۴ کال کې په چک جمهوریت کې د مهماتو د ډیپوګانو د چاودنو ترمنځ ارتباط ثابت کړي.
مسکو دا ټولې ادعاوې رد کړې دي.
