د هندوستان د بنګلور په ښار کې د تکنالوژۍ مرکز د سختو بارانونو له امله زیانمند شوی دی. پدې پیښو کې ګنشمیر کسانو ته مرګ ژوبله اوښتې ده.
د سیمې د چارواکو په وینا د سختو بارانونو له امله د هند د ټکنالوژۍ مرکز بنګلور ځینې برخې په اوبو کې ډوبې شوې دي، چې د مرګ ژوبلې لامل شوي دي . دا پېښه د هغه ښار د اوږدمهاله زیربناوو نیمګړتیاوې په ډاګه کوي چې په بې ساري چټکتیا سره پراخ شوی دی.
د هند د سلیکون وادۍ په نوم یادېدونکی دا سویلي ښار په چټکۍ سره د ودې له امله د ډېرو اوبو لارې بندې شوي یا د کثافاتو له امله ډکې شوي ، چې هر کال د درنو بارانونو پر مهال د اوبو د بندېدو لامل ګرځي.
د کرناټکا ایالت وزیر اعلی، سدارامیا، د دوشنبې په ماښام وویل: "د باران د اوبو ډیرې ویالې د خلکو لخوا اشغال شوي ، ویالې کمې او سطحي دي، او د خاورو او کثافاتو څخه ډکې دي."
هغه زیاته کړه: "ښاري ادارې ته څو ځله لارښوونې شوې دي چې دا ویالې پاکې کړي، او کار لا هم روان دی."
سدارامیا وویل چې دا د خواشینۍ خبره ده چې یوې ښځې په بنګلور کې خپل ژوند له لاسه ورکړ، هغه ښار چې د ۱۰ میلیونو څخه زیات خلک پکې ژوند کوي.
د ټایمز آف انډیا ورځپاڼې د سه شنبې په ورځ راپور ورکړ چې لږ تر لږه درې کسان مړه شوي دي.
هند هر کال د مانسون په موسم کې د سختو بارانونو او ناڅاپي سېلابونو سره مخ کېږي، او کارپوهان وایي چې د اقلیمي بدلونونو له امله د دې پېښو شدت او تکرار زیات شوی دی.
