د غزې له کنډوالو څخه نږدې ۱۰۰ نور جسدونه راایستل شول
داسې باور کېږي چې په غزه کې زرګونه فلسطینیان لا هم د ویجاړو شویو ودانیو تر کنډوالو لاندې ښخ پاتې دي.
د غزې ملکي دفاع ادارې ویلي چې په دې تړانګه کې یې له کنډوالو څخه د ۹۴ فلسطینیانو جسدونه راایستلي دي.
دغې ادارې د شنبې په ورځ په یوه اعلامیه کې، ویلي چې جسدونه یې د غزې ښار له مرکزي برخې راایستلي او د دیر البلح په مرکزي ښار کې د شهیدانو په هدیره کې د خښولو لپاره یې د الشفا طبي کمپلکس عدلي طب څانګې ته لېږدولي دي.
داسې باور کېږي چې د ۲۰۲۳ کال په اکتوبر کې پر دې تړانګه د اسرائیلو د جګړې له پیل راهیسې په غزه کې زرګونه فلسطینیان لا هم د ویجاړو شویو ودانیو تر کنډوالو لاندې ښخ پاتې دي.
ملکي دفاع ادارې ویلي چې د روغتیا او دیني اوقافو وزارتونو په همکارۍ توانېدلې چې په بېلابېلو ځایونو کې خښ شوي زرګونه جسدونه د دې تړانګې هدیرو ته ولېږدوي.
اسرائیلو د ۲۰۲۳ کال له اکتوبر راهیسې په غزه کې په بریدونو کې نږدې ۷۰،۷۰۰ کسان، چې ډېری یې ښځې او ماشومان دي، وژلي او تر ۱۷۱،۱۰۰ ډېر نور یې ټپیان کړي دي، مخکې له دې چې دغه بریدونه د اکتوبر په ۱۰مه د اوربند د هوکړې له مخې ودرېږي.
