فریدریش مېرز چې په یوه ځانګړي اورګاډي کې کییف ته تللی، د اقتصاد او انرژۍ وزیرې کاترینا رایش او د دفاعي او انرژۍ سکتورونو ۱۰ تنو سوداګرو یې ملتیا کوله.
مېرز په کییف کې په خپلو څرګندونو کې وویل: "که روسیې مخه ونه نیول شي، نو د جګړې ماشین به یې ژر یا وروسته زموږ لور ته هم راواوړي."
مېرز د دې په بیانولو سره چې اوکراین په راتلونکو اونیو کې د آلمان بشپړ ملاتړ ته اړتیا لري، ټینګار وکړ چې د راتلونکي ژمي له رارسېدو مخکې به د دغه هېواد تر څنګ ولاړ پاتې شي.
مېرز څرګنده کړه چې د اوکراین له ولسمشر ولادیمیر زیلینسکي سره به په خپله لیدنه کې د آلمان د ملاتړ د دوام پیغام ورکړي.
تمه کېږي چې د فریدریش مېرز د دغه سفر په ترڅ کې له اوکراین سره د نویو پوځي او مالي مرستو بسته اعلان شي، په دفاعي صنایعو کې پر لا زیاتې همکارۍ او د انرژۍ د بنسټیزو تاسیساتو پر بیارغونې خبرې وشي.
تمه ده چې د بې پیلوټه الوتکو د ګډ تولید تړونونه هم وروستي شي
د آلماني رسنیو د راپورونو له مخې، مېرز به اوکراین ته ژمنه ورکړي چې په ځانګړې توګه د روسیې له خوا په دې وروستیو کې د کارول شویو چټکو بریدګرو ډرون الوتکو پر وړاندې د مبارزې لپاره به، په لنډ وخت کې زرګونه شنډوونکې (دفاعي) ډرون الوتکې وسپاري.
د مېرز د سفر پر مهال تمه کېږي چې د آلمان او اوکراین ترمنځ د بې پیلوټه الوتکو د ګډ تولید په اړه تړونونه هم وروستي شي.
فریدریش مېرز د لومړي وزیر په توګه د خپلې دندې له پیلولو یوازې څو ورځې وروسته، د ۲۰۲۵ کال په مۍ میاشت کې د فرانسې له ولسمشر امانویل مکرون، د هغه وخت د بریتانیا له لومړي وزیر کییر سټارمر او د پولنډ له لومړي وزیر ډونلډ ټوسک سره یوځای کییف ته تللی و.
د روسیې د بهرنیو چارو وزارت پر بهرنیو سیلانیانو (مېلمنو) او ډیپلوماټانو غږ کړی و چې په دغه ښار کې پاتې نه شي.
د مسکو حکومت خبرداری ورکړی و چې په ځانګړې توګه دې له پوځي تاسیساتو او دولتي ودانیو له شاوخوا څخه لیرې واوسي.
