مسکو پر اوکراین تور پورې کړی چې د روسیې په سویلي سیمه کې یې برید کړی، چې له امله یې دوه ماشومان وژل شوي او نورو ملکي وګړو ته یې مرګ‌ژوبله اړولې ده.

د اوکراین ځایي چارواکو ویلي چې پر دغه هېواد د روسیې په بریدونو کې لږ تر لږه درې تنه، چې یو په کې په کییف کې ماشوم دی، وژل شوي او یو شمېر نور ټپیان دي.

د کییف ښاروال، ویتالي کلیچکو، د پنجشنبې په ورځ وختي پر ټیلیګرام د بریدونو د نوې څپې خبر ورکړ او ویې ویل چې په ټپیانو کې څلور روغتیايي کارکوونکي هم شامل دي. دغه کسان په "اوبولونسکي"  ولسوالۍ کې د یوې بیړنۍ غوښتنې پر مهال د توغندیو د ټوټو له امله ټپیان شوي دي.

هغه وویل چې شپږ ټپیان په روغتون کې بستر شوي او نورو ته په بهرنۍ بڼه  درملنه شوې ده. دغو بریدونو استوګنیزو سیمو ته پراخ زیانونه اړولي او د توغندیو ټوټې په "پودیلسکي"  سیمه کې د یوې ۱۶ پوړیزې ودانۍ پر شپږم پوړ لګېدلې دي.

کلیچکو زیاته کړه چې بیړني خدمات پر کار بوخت دي، ځکه په ښار کې په غیر استوګنیزو ودانیو او وسایطو کې اور لګېدلی دی. په "ډنیپرو" (Dnipro) کې هم د روسیې په بریدونو کې لږ تر لږه یو کس وژل شوی دی. د سیمه ییزې ادارې مشر الکساندر ګانژا پر ټیلیګرام ولیکل: "په ډنیپرو کې د روسیې په برید کې یو کس وژل شوی دی."

د تورونو تبادله
بلخوا، روسیې پر اوکراین تور پورې کړی چې د دغه هېواد په سویلي سیمه "کراسنودار کرای"  کې یې برید کړی او دوه ماشومان یې وژلي دي. د یادې سیمې والي وینیامین کونډراتیف پر ټیلیګرام لیکلي: "په تواپسې  کې پر استوګنیزو ودانیو د ترهګریز ډرون برید له امله دوه ماشومان چې ۵ او ۱۴ کلن وو، خپل ژوند له لاسه ورکړی دی."

د تیرې اونۍ په پای کې دواړو خواوو یو بل د اختر (ایسټر) د ۳۲ ساعته اوربند په ماتولو تورن کړل.