چارواکو په هند کې د انیل امباني د ریلائنس په شرکتونو چاپې وهلي

چارواکي وايي چې دا ډله د بانکي پورونو د غلا کولو لپاره د ښه پلان په جوړولو کې ښکیل ده.

د هند د مالي جرمونو پر ضد ادارې (ED) د انیل امباني له ریلاینس ډلې سره تړلو شرکتونو پر دفترونو څو چاپې وهلې دي. د دولتي تلویزیون دوردَرشن په وینا، دا عملیات د احتمالي پیسو مینځلو په قضیه کې ترسره شوي دي.

د پریس ټرسټ آف انډیا  (PTI) د راپور له مخې، چارواکو د ممبۍ په مالي پلازمېنه کې له ۳۵ څخه ډېر ځایونو تلاشي اخیستې چې له ۵۰ شرکتونو او ۲۵ اشخاصو سره تړاو لري. دا چاپې د " پیسو مینځلو د مخنیوي قانون"  لاندې ترسره شوې دي.

د سرچینو په حواله، چارواکو شاوخوا ۳۵۰ میلیونه ډالره هغه پورونه څېړي چې د ۲۰۱۷ او  ۲۰۱۹ کلونو ترمنځ د امباني د ډلې شرکتونو ته ورکړل شوي وو او ګومان کېږي چې دا پورونه د جعلي شرکتونو او ډلو تر منځ په ناقانونه ډول انتقال شوي دي.

اداره تور لګوي چې دغه ډله‌ییز جوړښت د یو "ښه پلان شوي" سکیم له لارې د بانک پورونه اختلاس کړي دي. همداراز ویل شوي چې د یس بانک چارواکو ته رشوتونه ورکړي تر څو د بانک داخلي اصول تر پښو لاندې شي او پورونه تصویب شي.

انیل امباني، چې د آسیا تر ټولو شتمن کس موکیش امباني ورور دی، په ۲۰۰۸ کال کې د نړۍ شپږم تر ټولو شتمن کس ګڼل کېده. خو په وروستیو کلونو کې یې کاروباري شتمني ډېره زیانمنه شوې ده.

تېره میاشت راپورونه خپاره شول چې د فرانسوي شرکت داسو ایویېشن او د امباني شرکت ریلاينس ایرو سټرکچر ترمنځ ګډه پروژه (JV)، چې د رافال جنګي الوتکو د تولید لپاره وه، ښایي پای ته ورسیږي. سرچینې وايي دا پرېکړه ځکه شوې چې امباني ونه توانېد چې د ګډې پروژې د دوام لپاره لازمې پانګونې برابرې کړي.

د دې پرمختګونو سره، د انیل امباني پر کاروباري راتلونکي یو ځل بیا پراخ شکونه راپورته شوي دي.