د امریکا ولسمشر اشاره وکړه چې له تهران سره یوه هوکړه نږدې کېدونکې ده، او خبریالانو ته یې وویل که په پای کې یوه معامله وشي، دی به ډېر خوښ شي.

د امریکا متحده ایالاتو ولسمشر ډونالډ ټرمپ ویلي چې د امریکا او ایران ترمنځ د داسې یوې هوکړې لپاره "ډېر ښه چانس" شته چې تهران د اټومي وسلو له ترلاسه کولو څخه منع کړي. دا خبره هغه څو ساعته وروسته له هغه وکړه چې ویلي یې وو، ده پر ایران یو پلان شوی پوځي برید ځنډولی ترڅو مذاکراتو ته لاره هواره شي.

ټرمپ وویل چې په منځني ختیځ کې د امریکا د مهمو متحدینو مشرانو له ده غوښتي وو چې پر ایران د سه شنبې ورځې پلان شوی برید وځنډوي ترڅو له تهران سره خبرې اترې دوام ومومي. خو هغه خبرداری ورکړ که هوکړه ونه شي، متحده ایالات لا هم د یوه پراخ پوځي برید پیلولو ته چمتو دي.

ټرمپ د دوشنبې په ورځ د درملو د بیو په اړه یوې غونډه کې خبریالانو ته وویل: "داسې ښکاري چې ډېر ښه چانس شته چې دوی یوې پایلې ته ورسېږي. که موږ وکولی شو دا کار د هغوی له سخت بمبار پرته ترسره کړو، زه به ډېر خوښ شم."

دا څرګندونې وروسته له هغه وشوې چې د امریکا ولسمشر په خپله ټولنیزه رسنۍ 'ټروت سوشل' (Truth Social) کې ولیکل: "د قطر امیر تمیم بن حمد آل ثاني، د سعودي عربستان وليعهد محمد بن سلمان آل سعود، او د متحده عربي اماراتو ولسمشر محمد بن زاید آل نهیان له ما وغوښتل چې د ایران پر اسلامي جمهوریت زموږ پلان شوی پوځي برید وځنډوم، کوم چې سبا ته ټاکل شوی و."

متحده ایالات عملیات دروي
ټرمپ زیاته کړه چې د خلیج مشرانو ورته ویلي چې "اوس مهال جدي مذاکرات روان دي" او هیله یې وښوده چې لا هم ډیپلوماټیکه هوکړه ترلاسه کېدی شي. هغه وویل چې په وړاندیز شوې هوکړه کې به د ایران له خوا د اټومي وسلو پر ترلاسه کولو کلک بندیز شامل وي، او دا یې د هرې هوکړې لپاره یو مرکزي شرط وباله.

هغه زیاته کړه: "دا هوکړه به، په ډېره مهمه توګه، د ایران لپاره د اټومي وسلو د نه درلودلو شرط ولري!"

ټرمپ وویل چې د خلیج د مشرانو د "احترام" په خاطر یې د دفاع وزیر پیټ هیګست ، د لوی درستیز جنرال ډینیل کاین  او د امریکا پوځي قوماندانانو ته لارښوونه کړې چې د اوس لپاره له پلان شويو عملیاتو څخه لاس واخلي .