د ایران په سویل ختیځ کې د وسله والو په برید کې د سپاه پاسداران درې غړي ووژل شول
ایران دولتي رسنیو خبر ورکړی چې وسله والو د ایران په سویل ختیځ سیستان او بلوچستان ولایت کې د پاکستان پولې ته نږدې د سپاه پاسداران درې غړي وژلي دي.
د ایران رسمي خبري اژانس "ایرنا" ویلي چې د سپاه پاسداران پر دغو غړو د پلازمېنې تهران په ۱۱۲۵ کیلومترۍ (۷۰۰ میله) سویل ختیځ کې د "لار" ښارګوټي ته نږدې په یوه غرنۍ سیمه کې د ګزمې پرمهال برید شوی.
ایرنا دا نه دي ویلي چې په دغه برید کې د سپاه پاسداران کوم غړی ټپي شوی هم دی که نه.
سپاه پاسداران د هغو بریدګرو په لټه کې دي چې دوی یې "ترهګر" بولي، خو هغوی لا هم تښتېدلي دي. ایرنا خبر ورکړی چې د دغه برید مسئولیت تر اوسه کومې ډلې پر غاړه نه دی اخیستی.
دغه ولایت چې له افغانستان او پاکستان سره ګډه پوله لري او د ایران له کمو پرمختللو سیمو څخه ګڼل کیږي، کله ناکله د وسله والو ډلو، د نشه يي توکو د وسله والو قاچاقبرانو او ایراني امنیتي ځواکونو ترمنځ د خونړیو نښتو شاهد وي.
د اګست په میاشت کې، وروسته له هغه چې یوې ډلې پنځه ګزمه کوونکي پولیس وژلي وو، ایراني امنیتي ځواکونو یوه اونۍ وروسته په دغه ولایت کې په دریو جلا عملیاتو کې ۱۳ وسله وال ووژل.
