اردوغان: په غزه کې وینې تویدنه، اوښکې او ویجاړتیا نور بس دی
د تورکیې ولسمشر رجب طیب اردوغان د هیواد د پارلمان د نوي تقنیني کال په پرانیستغونډه کې په خپله وینا کې ، له غزې نه د خپل هیواد پیاوړی او نه ماتیدونکی ملاتړ تکرار کړ او د اسرائيلو جګړه یې وغندله.
د تورکیې ولسمشر رجب طیب اردوغان وویل چې «غزه نوره د وینو، اوښکو او ورانۍ زغم نه لري،» او پر دغې تړانګې د اسرائيلو د جګړې د سمدستي پای ته رسولو غوښتنه یې وکړه.
هغه د چهارشنبې په ورځ د پارلمان د نوي تقنیني کال په پرانیستغونډه کې د وینا پرمهال، په غزه کې د اسرائيلو کړنې، نسل وژنه وبلله، وغندله او ټینګار یې وکړ چې تورکیه به د فلسطین له خلکو سره په کلکه ولاړه وي.
اردوغان وویل چې نړۍ ولیدل چې څنګه د غزې د خلکو پر وړاندې «تر ټولو عصري وسلې» وکارول شوې، خو د «غزې د زړورو زامنو» مقاومت یې وستایه. هغه د تورکیې ډیپلوماتیکو او بشري هڅو ته اشاره وکړه او ټینګار یې وکړ چې فلسطینیان پخپله د انقرې د رول «تر ټولو نږدې شاهدان» دي. هغه زیاته کړه: «زموږ کلک دریځ به تورکیه د خپل وخت یوه اخلاقي بېلګه وګرځوي، چې په تاریخ کې به په زرینو کرښو ولیکل شي.»
د تورکیې د پخواني دریځ په بیا تاییدولو سره، اردوغان د ۱۹۶۷ کال د پولو پر بنسټ د یوه خپلواک فلسطيني دولت لپاره، چې پلازمېنه به یې ختیځ بیت المقدس وي، د مبارزې ژمنه وکړه.
هغه وویل چې په غزه کې دایمي سوله لومړی د اسلامي نړۍ دنده او بیا د نړیوالې ټولنې مسؤلیت دی، او هیله یې څرګنده کړه چې «له سیند څخه تر بحر پورې به د سولې، ارامۍ او امنیت ښکلې ورځې راشي.»
