ایمانوئل مکرون د امریکا په نیویارک ښار کې د ملګرو ملتونو د ۸۱مې عمومي اسامبلې په غونډه کې خپلو خبرو کې وویل چې ټول د امپریالیزم او زورواکۍ د بېرته راستنېدو په اړه خبرې کوي.
«د سولې جوړولو لپاره باید بیا په کلکه اراده ګامونه پورته کړو»
مکرون د جګړې، سولې او ټیکنالوژۍ په برخه کې د پياوړو زبرځواکونو لخوا پر نورو د خپلو قوانینو د تپلو پر وړاندې د عدالت او ګډو ګټو د خوندیتوب غوښتنه وکړه او پاملرنه یې دې ته واړوله چې په نړۍ کې د نه حل کېدونکو جګړو او بحرانونو کچه لوړه شوې ده.
ایمانوئل مکرون دې ته په اشارې سره چې نړیوال نظام د زورواکو او ځواکمنو پر نظام بدل شوی، دا پوښتنه راپورته کړه: «ایا موږ په واقعیت کې په داسې یوه نړۍ کې ژوند کول غواړو؟»
مکرون څرګنده کړه چې د جګړو پر وړاندې باید د ملګرو ملتونو منشور ته موافقې او برابرې حل لارې وپلټل شي او په دې برخه کې باید دوه ګونی معیار ونه کارول شي. هغه زیاته کړه: «موږ څو ځلې اورېدلي چې په اروپا کې د ولسونو حاکمیت او سرنوشت ارزښت لري، خو کله چې خبره افریقا ته رسېږي دا لږ ارزښتمن ګڼل کېږي؟»
«په غزه کې روان حالت زموږ د ټولو لپاره د شرم دی»
مکرون د لبنان پر بشپړ ملي حاکمیت د خپل ملاتړ یو ځل بیا په ډاګه کولو سره وویل: «خو یو پیاوړی او مستقل لبنان د دې وړتیا لري چې حزب الله بې وسلې کړي او د لبنانیانو او د هغوی د ګاونډیانو امنیت تامین کړي.»
ایمانوئل مکرون د فلسطینیانو پر حاکمیت او مشروع حقونو په ټینګار سره دا لاندې ټکي روښانه کړل:
«یو کال وړاندې په دغه تالار کې ډېری هېوادونو د فلسطین دولت په رسمیت وپېژانده. تاسو پر کاغذ اعتراف وکړ، خو واقعیت ته وګورئ. که موږ اقدام ونه کړو، زموږ د باور او ارادې اهمیت په څه کې دی؟ د غزې په اړه ځینې ګومان کوي چې سوله تامین شوې ده، خو دغې وضعیت د بشري مرستو رسولو لار نده پرانیستې. دا حالت د شرم انځور دی، زموږ ټولو لپاره د شرم وړ دی.»
مکرون همدارنګ زیاته کړه چې په اشغال شوې لوېدیځه غاړه کې هم هره ورځ د بشري حقونو د تېریو شاهدان دي او له نقض څخه باید ډډه وشي او د فلسطینیانو مشروع حقونو ته باید درناوی وشي.
د دې په ارزیابۍ سره چې دا پرېکړې د اسرائیلو د امنیت لپاره هم لومړنی شرط دی، مکرون وویل هغه کسان چې دا فکر کوي د اسرائیلو امنیت د هغوی د ګاونډیو هېوادونو د حاکمیت په ماتولو کې دی، له لوې خطا او تېروتنې سره مخ دي.
د فرانسې مشر همدا راز د سوریې له ملي حاکمیت او خاورې څخه د ملاتړ په څرګندولو سره وویل چې دوی د دغه هېواد د ارضي تمامیت او حاکمیت د ټینګښت لپاره هڅې کوي.
د اسرائیلو د لومړي وزیر دفتر لخوا په خپره شوې خبرپاڼه کې ویل شوي چې لومړي وزیر بنیامین نتانیاهو د مکرون دغه څرګندونې غندلي او دا څرګندونې یې یو بي ځایه خبرې بللي دي.
همدارنګه د اسرائیلو د مالیې وزیر بتسلئیل سموټریچ د «ایکس» (پخواني ټویټر) پر خپله پاڼه په یوه خپاره کړي پیغام کې ایمانوئل مکرون پر «دروغ ویلو» تورن کړی دی.
