د اوکراین د پلازمېنې کیف  ښاروال وايي چې کیف  د روسیې تر 'لوی' برید لاندې دی

روسیې د اوکراین پر پلازمېنه کیف یو لوی ګډ برید پیل کړی، چې د ښاروال ویتالي کلیچکو په وینا، د پلازمېنې په ډېرو سیمو کې د اورلګېدنې او د ویجاړیو د خپریدو لامل شوی دی.

د اوکراین د پلازمېنې ښاروال ویلي، چې د کیف نږدې هره ولسوالۍ د 'پراخ' برید لاندې ده؛ د AFP خبري اژانس په داسې حال کې د ښار په مرکز کې د چاودنو خبر ورکړی، چې روسیې پر زیربناوو خپل بریدونه ګړندي کړي دي.

د کیف ښاروال ویتالي کلیچکو دا یو 'پراخ دښمنانه برید' بللی او ویلي یې دي چې د هوايي دفاع ځواکونه په دنده بوخت دي.

کلیچکو په ټیلیګرام کې لیکلي: "لږ تر لږه ۱۱ کسان ټپیان شوي؛ چې پنځه یې روغتون ته وړل شوي؛ په دوی کې یوه امیندواره ښځه او یو سړی شامل دي چې وضعیت یې 'خورا نازک' دی."

هغه وویل: "د تودوخې شبکې ځینې برخې زیانمنې شوې دي"؛ او زیاته یې کړه چې په شمال ختیځه دیسنیانسکي ولسوالۍ کې ځینې ودانۍ په موقتي توګه له تودوخې بې برخې شوې دي.

هغه دا هم وویل چې کیدای شي د برېښنا او اوبو په رسولو کې هم خنډونه رامنځته شي.

د کیف د سیمه ییزې پوځي ادارې مشر میکولا کلاشنیک د جمعې په ورځ وویل چې په پلازمېنه کې توغندیو او بې پیلوټه الوتکو مهمې زیربنایي تاسیسات په نښه کړي دي.

د AFP خبریالانو د بې پیلوټه الوتکو په وړاندې کارول شوې تعقیبي مرمۍ او د توغندیو د دفاع څو ځای پر ځای شوي سیسټمونه لیدلي دي.

د ښار د پوځي ادارې مشر تیمور تکاچینکو په ټولنیزو رسنیو کې لیکلي: "روسان د استوګنې ودانۍ په نښه کوي. د کیف په نږدې هره ولسوالۍ کې ګڼ شمېر لوړپوړې ودانۍ زیانمنې شوې دي."

کلیچکو راپور ورکړی چې د کیف له ۱۰ ولسوالیو څخه په اتو کې اورلګېدنه یا ودانیو ته زیان اوښتی او روغتیايي بېړني غبرګون ډلې ټولو ته استول شوې دي.

د کیف نړیوال هوايي ډګر ته نږدې د ترانسپورتي مرکز، سولومیانسکي ولسوالۍ کې د یوې پنځه پوړیزې ودانۍ پر بام اور لګېدلی دی.

اوکراین د استوګنې پر ودانیو او د تیلو پر ډیپو برید کړی

په ورته وخت کې، د چارواکو په وینا، د اوکراین یوې بې پیلوټه الوتکې د روسیې د تور سمندرګي په نووروسیسک ښار کې درې اپارتمانونه، د تیلو یو ډیپو او ساحلي تاسیسات زیانمن کړي دي.

د کراسنودار سیمې عملیاتي مرکز په ټیلیګرام کې لیکلي: د بې پیلوټه الوتکې ټوټې پر درې اپارتمانونو لګېدلې، شیشې یې ماتې کړي خو چا ته زیان نه دی اوښتی.

دوی زیاته کړه چې برید د یوه انتقالي کمپلیکس د تیلو ډیپو او ساحلي تاسیساتو ته هم زیان رسولی، خو نور جزئیات یې نه دي ورکړي.

دا برید په داسې حال کې کیږي چې د کیف لویدیځ متحدین پر روسیې فشار زیاتوي.

د چهارشنبې په ورځ، کاناډا د روسیې د بې پیلوټه الوتکو پر تولید او د انرژۍ پر تولید نوي بندیزونه اعلان کړل، چې د سایبري بریدونو لپاره کارول کېدونکې زیربناوې هم پکې شاملې دي.

په هماغه ورځ، د G7 د بهرنیو چارو وزیرانو په اوکراین کې د سمدستي اوربند غوښتنه وکړه او د هیواد له ځمکنۍ بشپړتیا څخه یې خپل 'نه ماتېدونکی' ملاتړ اعلان کړ.

د اروپا کمیسیون په پام کې لري چې د اوکراین د جګړې وروسته د روسیې کنګل شوې شتمنیو یوه برخه وکاروي ترڅو کیف ته د راتلونکو دوو کلونو لپاره د بودیجې او پوځي ملاتړ په موخه پورونه ورکړي.

خو د نږدې څلور کلنې جګړې وروسته، دواړه خواوې په ژورو سنګرونو کې دي؛ مسکو د اوربند غوښتنې ردوي او د امریکا د ولسمشر ډونالډ ټرمپ د اوږدې مودې بند پاتې سولې تړون د بیا راژوندي کولو هڅو سره مخالفت کوي.

روسیې د دوشنبې په ورځ اعلان وکړ چې د پراخې جبهې په اوږدو کې یې درې نور کلي نیولي، چیرې چې دوی د خپل انساني ځواک او تجهیزاتو له برترۍ څخه کار اخلي.