د پاکستان د خیبر پښتونخوا ایالت په کوهاټ سیمه کې پر امنیتي ځواکونو په یوه برید کې د لومړنیو معلوماتو له مخې د ۶ پولیسو په ګډون ۷ کسان وژل شوي دي.

د سیمې پولیسو چارواکو ویلي چې د خیبر پښتونخوا ایالت د کوهاټ اړوند د شکردرې پر سړک د امنیتي ځواکونو یو موټر په نښه شوی دی.

د پولیسو چارواکو ویلي، په برید کې ۶ پولیس او یو ملکي وګړی وژل شوي او د ۳ ټپي پولیسو او یوه ملکي وګړي درملنه روانه ده. هغوی زیاته کړې چې له برید وروسته د پولیسو موټر ته "د وسله والو له خوا اور ورته شوی" دی.

د پاکستان د کورنیو چارو وزیر محسن نقوي په یوه بیان کې دا برید په کلکه غندلی او د وژل شویو کسانو له کورنیو سره یې خپله خواخوږي څرګنده کړې ده.

په پاکستان کې وسله وال بریدونه په ځانګړې په خیبر پښتونخوا او بلوچستان  ایالتونو کې زیات شوي دي.

په دواړو ایالتونو کې وسله والې ډلې چې د پښتنو او بلوڅو قومونو د حقونو د دفاع ادعا کوي، د پاکستان پر امنیتي ځواکونو او ملکي وګړو بریدونه ترسره کوي.

اسلام اباد ادعا کوي چې پاکستاني طالبان (TTP) په افغانستان کې میشت دي او له هغه ځایه خپل بریدونه تنظیموي، خو افغان حکومت دا ادعاوې ردوي.

په بلوچستان کې بیا د بلوچستان د ازادۍ پوځ (BLA) بریدونه ډېر دي. BLA غواړي چې بلوچستان ایالت له پاکستان څخه جلا شي او بلوڅ خلک پر دې سیمه واکمن شي.