اسرائیلو تایید کړه چې له حماس څخه وروستی ترلاسه شوي مړي د اسرائیلي سرتیرو مړي دي.
په غزه کې روغتیايي چارواکي وايي چې اسرائیلو د ۴۵ فلسطینیانو جسدونه سپارلي دي.
د اسرائیلو پوځ د دوشنبې په ورځ تایید کړه چې د هغو درې کسانو مړي چې د فلسطیني مقاومت ډلې حماس د اوربند د موافقې له مخې یوه ورځ مخکې سپارلي، د اسرائیلي پوځیانو دي.
په یوه پوځي اعلامیه کې ویل شوي چې دغه مړي د کرنل عساف حمامي، کپتان عمر مکسیم نیتورا او سټاف سرجنټ اوز دانیل دي. دوی ټول د ۲۰۲۳ کال د اکتوبر په ۷مه د غزې پولې ته نېږدې وژل شوي وو.
حماس د یکشنبې په ماښام د سره صلیب له لارې د دغو درېیو سرتېرو مړي د هغه اوربند د تړون له مخې وسپارل، چې د امریکا د ولسمشر ډونالډ ټرمپ د ۲۰ مادو د غزې پلان د یوې برخې په توګه د اکتوبر په ۱۰مه نافذ شوی و.
د حماس د معلوماتو له مخې، تر اوسه یې ۲۰ اسرائیلي بنديان ژوندي خوشې کړي او د ۲۸ مړو له ډلې ۲۱ کسان یې سپارلي، چې ډېری یې اسرائیلي دي. په هرصورت، اسرائیل ادعا وکړه چې د ترلاسه شویو جسدونو څخه یو یې د دوی د ورک شویو بندیانو سره سمون نه لري.
د غزې د روغتیا چارواکي د اسوشېټېډ پرېس له قوله وايي چې، اسرائیل د ۴۵ فلسطینیانو مړي سپارلي دي.
اسرائیل د اوربند د دوهم پړاو د خبرو پیل د ټولو یرغمل شوو کسانو د مړو له سپارلو سره تړلی دی، خو حماس وايي دا بهیر وخت ته اړتیا لري ځکه په غزه کې پراخ ویجاړۍ شوې دی.
د تړون لومړی پړاو د نږدې ۲،۰۰۰ فلسطیني بندیانو د خوشې کولو په بدل کې د اسرائیلي یرغمل شوو د آزادېدو بندوبست لري. دغه طرحه همدارنګه د غزې د بیا رغونې او د حماس پرته د نوي اداري جوړښت د رامنځته کولو لیدلوری لري.
اسرائیل له ۲۰۲۳ کال د اکتوبر راهیسې په غزه کې نږدې ۶۹،۰۰۰ کسان وژلي، چې ډېری یې ښځې او ماشومان دي، او له ۱۷۰،۰۰۰ ډېر نور یې ټپيان کړي دي.
