اردوغان: د سیمه ییز اور له کندې د تورکیې بهر ساتل تر ټولو ستر لومړیتوب دی
ناټو له ایران څخه د تورکیې پر لور د توغول شوي درېیم توغندي له شنډولو وروسته، ولسمشر اردوغان د لمسونو پر وړاندې خبرداری ورکړ.
د تورکیې جمهوریت ولسمشر رجب طیب اردوغان وویل، له پراخېدونکې سیمه ییزې جګړې څخه د تورکیې لرې ساتل د حکومت تر ټولو مهم لومړیتوب دی او د هغو لمسونو پر وړاندې یې خبرداری ورکړ چې موخه یې هېواد جګړې ته راکاږل دي.
اردوغان د جمعې په ورځ په یوه وینا کې وویل: "زموږ تر ټولو ستر لومړیتوب دا دی چې خپل هېواد د دې اور له کندې بهر وساتو." هغه ټینګار وکړ چې انقره د هغو پلانونو، دامونو او لمسونو پر وړاندې په ډېر احتیاط عمل کوي چې غواړي ترکیه جګړې ته راوباسي.
دا څرګندونې په داسې وخت کې کېږي چې پر ایران له بریدونو او د ایران له ځوابي بریدونو وروسته سیمه ییز کړکېچ زیات شوی دی. ناټو له ایران څخه پر تورکیې توغول شوی درېیم توغندی هم شنډ کړ.
ولسمشر اردوغان وویل، ترکیه د خپلې خاورې پر وړاندې د ګواښونو پر وړاندې لازم ګامونه پورته کوي او د خپل هوايي حریم دفاع ته به دوام ورکړي.
هغه زیاته کړه، ترکیه د خپل هوايي حریم څخه د سرغړونې کوونکو ټولو ګواښونو پر وړاندې لازم تدابیر نیسي او لکه څنګه چې یې تېره شپه اقدام وکړ، بیا به یې هم وکړي.
د مذهبي کړکېچ خبرداری
اردوغان له خپلو هېوادوالو وغوښتل چې د روان کړکېچ پر مهال د مذهبي او قومي اختلافاتو د راپارولو هڅو پر وړاندې هوښیار واوسي.
هغه وویل، دا ډول کړکېچونه ښايي پر ایران د بریدونو او په سیمه کې د عمومي بې ثباتۍ په فضا کې په قصدي توګه راوپارول شي.
هغه وویل: "زموږ هېوادوال باید د مذهبي او قومي اختلافاتو د راپارولو د هڅو پر وړاندې محتاط و اوسي."
ولسمشر همداراز ټینګار وکړ چې بدلېدونکی جیوپولیټیک وضعیت له تورکیې څخه غواړي چې ګړندی او ډېر ستراتیژیک حرکت وکړي.
هغه وویل: "موږ یوې نوې دورې ته ننوځو. په دې دوره کې باید موږ ډېر ګړندي، فعال او مخکښ واوسو."
د بشریت وجدان
اردوغان همداراز په ځانګړې توګه د غزې په اړه د نړیوالې ټولنې پر انتخابي غبرګونونو نیوکه وکړه.
هغه وویل، ځینې هېوادونه له ظلم او نسل وژنې سترګې پټوي، په داسې حال کې چې ځینې نور په ښکاره توګه د تاوتریخوالي له مسؤلو اړخونو ملاتړ کوي.
هغه وویل: "د یتیمو فلسطینیو او سوریایي ماشومانو درد او کړاو، د مجازي نړۍ د جعلي وجدان له امله، د یوه یوازیني پینګوین په پرتله لږ پام ځانته راواړاوه."
ولسمشر اردوغان زیاته کړه، په داسې نړۍ کې چې د وجدان له بحران سره مخ ده، دوی هڅه کوي چې ترکیه د بشریت وجدان وګرځي.