د متحده ایالاتو حکومت خپلو اتباعو ته جدي خبرداری ورکړی چې اسرائیلو، عراق یا ایران ته سفر ونه کړي، ځکه چې د اسرائیلو او ایران ترمنځ شخړه د اسرائیلو د بې ساري بریدونو او د تهران د ځوابي بریدونو له امله شدیده شوې ده.
د متحده ایالاتو د بهرنیو چارو وزارت ویاندې، ټامي بروس، د سه شنبې په ورځ یوې خبري غونډې ته وویل: "موږ خپلو اتباعو ته یادونه کوو چې اسرائیل یا عراق ته سفر ونه کړي او په هیڅ ډول شرایطو کې ایران ته سفر ونه کړي."
دا اعلان په داسې حال کې شوی چې د اسرائیلو بریدونه پر ایران شپږمې ورځې ته داخل شوي، او دواړه خواوې په خپلو کې بریدونه تبادله کوي، چې دا د دوی تر ټولو شدیده مستقیمه شخړه ګڼل کېږي.
بروس وویل چې متحده ایالاتو د منځني ختیځ لپاره ۲۴ ساعته کاري ځواک جوړ کړی ترڅو په سیمه کې خپلو اتباعو او ډیپلوماتیکو کارکوونکو ته ملاتړ برابر کړي.
هغې زیاته کړه چې دغه کاري ځواک تر دې دمه له ۳۰ څخه زیات امنیتي خبرداري او د سفر مشورې تازه کړې دي. هغې وویل: "د بهرنیو چارو وزارت د منځني ختیځ کاري ځواک جوړ کړی ترڅو د متحده ایالاتو اتباعو، ډیپلوماتیکو ماموریتونو او کارکوونکو ته ملاتړ برابر کړي او ډیپلوماتیکې اړیکې همغږي کړي."
متحده ایالات چې په ایران کې سفارت نه لري، په عراق کې د خپل سفارت کارکوونکي کم کړي په عراق او اسرائیلو کې یې غیر ضروري کارکوونکو او د هغوی کورنیو ته د وتلو اجازه ورکړې ده.
بروس دا تایید نه کړه چې آیا د متحده ایالاتو اتباعو د احتمالي تخلیې لپاره چمتووالی روان دی که نه، خو د هغې څرګندونې په داسې حال کې شوې چې په دې اړه اوازې زیاتې شوې دي چې واشنګټن ښایي په مستقیم ډول دې شخړې ته داخل شي.
اسرائیلو د جمعې په ورځ پر ایران پراخ هوایي بریدونه وکړل چې له امله یې له ۲۲۰ څخه زیات کسان وژل شوي او له ۱۴۰۰ څخه زیات ټپیان شوي دي. ایران په ځوابي بریدونو لاس پورې کړ، او جګړه له هغې ورځې راهیسې هره ورځ روانه ده.
دغه کړکېچ د دې اندېښنې لامل شوی چې ښایي په سیمه کې یوه پراخه جګړه پیل شي.
