د امریکا د استازو په جرګه کې د جمهوري غوښتونکو مشرانو د پنجشنبې په ورځ د ایران سره د جګړې په اړه  د ولسمشر ډونالډ ټرمپ د جنګي واکونو د محدودولو په اړه پر یو پریکړه لیک رایه اچونه وروسته له هغه لغوه کړه، چې د خپلو غړو د نشتوالي (غیاب) له امله د دې مسودې د ماتېدو له خطر سره مخ شول.

ډیموکراتانو په وار وار په استازو جرګه او سنا دواړو کې د ټرمپ د جنګي واکونو د محدودولو لپاره پر رایې اچونې ټینګار کړی دی، او دغه هڅې په وروستیو اونیو کې په تدریجي ډول د لا زیاتو جمهوري غوښتونکو ملاتړ هم ترلاسه کړی دی.

دا پریکړه لیک د نیویارک د ډیموکرات استازي ګریګوري میکس (Gregory Meeks) لخوا وړاندې شوی و، چې د استازو جرګې د بهرنیو اړیکو په کمیټه کې د ډیموکراتانو مشر دی.

د استازو جرګې ډیموکراتانو پر جمهوري غوښتونکو د رایې اچونې د لغوه کولو له امله کلکې نیوکې وکړې او د جمهوري غوښتونکو تر کنټرول لاندې جرګه یې تورنه کړه چې د ټرمپ د ادارې ننګه کوي او د هغه دوه اړخیزه قانون مخه نیسي چې ټرمپ به یې په منځني ختیځ کې د جګړې پای ته رسولو ته اړ کاوه.

په استازو جرګه کې د رایې اچونې دا لغوه کېدل وروسته له هغه مخې ته راغلل چې ټرمپ د روانې اونۍ په لومړیو کې وویل، هغه باور لري چې د ایران په وړاندې د امریکا نظامي کمپاین پراخ ولسي ملاتړ ترلاسه کړی دی.