د امریکا د ولسمشر ډونلډ ټرمپ لخوا د سفر نوي بندیز کولی شي د افغانستان او پاکستان خلک د راتلونکې اونۍ د پیل نه په اعتبار سره د هیواد د امنیت او د تفتیش خطرونو د بیاکتنې پراساس امریکا ته د ننوتلو څخه منع شي. د ویلو ده چې درې جلا جلا سرچینو دا خبره تایید کړې ده .
درې سرچینو د نوم د نه ښودو په شرط وویل چې نور هیوادونه هم د بندیز په لست کې شتون لري خو تر اوسه پورې معلوم ندي چې کوم کوم هیوادونه دي.
دا اقدام د جمهوري غوښتونکي ولسمشر لخوا د اوو اسلامي هیوادونو څخه د مسافرینو په اړه د لومړۍ دورې بندیز ته اشاره کوي، یوه پالیسي چې په ۲۰۱۸ کال کې مخکې ددې چې د سترې محکمې لخوا تایید شي څو ځلې تکرار شوه.
پخواني ډیموکرات ولسمشر جو بایډن، چې د ټرمپ ځای ناستی شو، په ۲۰۲۱ کې بندیز لغوه کړ، او وویل چې دا "زموږ په ملي وجدان باندې داغ" دی.
ټرمپ د جنوري په ۲۰ یو اجرایوي فرمان صادر کړ چې له مخې د ملي امنیت ګواښونو د کشف لپاره د هر بهرنی وکړی چې امریکا ته د ننوتلو په لټه کې وي باید د امنیتي پلوه وڅیړل شي.
په دې حکم کې د کابینې څو غړو ته لارښوونه وشوه چې د مارچ تر ۱۲مې پورې د هغو هېوادونو لیست وسپاري چې سفر باید په جزوي یا بشپړ ډول وځنډول شي ځکه چې د دوی "د تفتیش او پلټنې معلومات خورا نیمګړي دي".
درې سرچینو او یوې بلې سرچینې د نوم د نه ښودلو په شرط وویل چې افغانستان به د بشپړ سفر بندیز لپاره د هیوادونو په وړاندیز شوي لیست کې شامل شي.
درې سرچینو وویل چې پاکستان به هم پدې لست کې د شاملولو لپاره وړاندیز شي.
د بهرنیو چارو وزارت، عدلیې او کورني امنیت وزارتونه او د ملي استخباراتو د رئیس دفتر، چې مشران یې د دې نوښت څارنه کوي، پدې اړه د څه ویلو نه ډډه وکړه.
یوې سرچینې په ګوته کړه هغه افغانان چې په امریکا کې د کډوالو په توګه یا په ځانګړو ویزو کې د بیا میشتیدنې لپاره تصویب شوي لومړی د سختې پلټنې څخه تیریږي . دوی به په نړۍ کې "د هر نفوس په پرتله ډیر جدي پلټنو تابع ونیول شي"
سرچینې ویلي دي چې د بهرنیو چارو وزارت دفتر چې د دوی د بیا میشتیدنې څارنه کوي د سفر بندیز څخه د ځانګړي مهاجرت ویزې لرونکو لپاره د معافیت غوښتنه کوي مګر دا احتمال نه لیدل کیږي چې معافیت ورکړ شي .
رویټرز تیره میاشت راپور ورکړ دې دفتر ته چې د افغانانو د بیا میشتیدنې د هڅو همغږي کوونکی دی، ویل شوي چې د اپریل تر میاشتې پورې د دې دفتر د تړلو لپاره یو پلان جوړ کړي.
طالبان، چې د ۲۰۲۱ کال په اګست کې د دوو لسیزو جګړو وروسته د وروستي امریکایي سرتیرو د وتلو په وخت کې کابل ونیول، د وسله والو ډلو لخوا د بغاوت سره مخ دي. پاکستان هم د اورپکۍ سره لاس او ګریوان دی.
د ټرمپ لارښوونه د کډوالۍ د مخنیوي یوه برخه ده چې هغه د خپلې دوهمې دورې په پیل کې پیل کړې وه.
هغه د ۲۰۲۳ کال د اکتوبر په یوه وینا کې په خپل پلان بیاکتنه وکړه او ژمنه یې وکړه چې د غزې، لیبیا، سومالیا، سوریې، یمن او "هر هغه بل ځای چې زموږ امنیت ته ګواښ رامنځته کوي په وګړو به محدودیتونه ولګوي.
د AfghanEvac مشر شان وان ډایور، ، د هغو ډلو ایتلاف چې د امریکا حکومت سره د افغانانو د ایستلو او بیا میشتیدنې همغږي کوي، له هغو کسانو څخه چې د امریکا د اعتبار وړ ویزې لري غوښتنه وکړه چې که امکان ولري ژر تر ژره سفر وکړي.
هغه په یوه بیان کې وویل: "که څه هم هیڅ رسمي اعلان نه دی شوی، د امریکا په حکومت کې ډیری سرچینې ددې پخلی کوي چې کیدای شي د راتلونکې اونۍ د پیل راهیسې د سفر نوی محدودیت نافذ شي."
هغه وویل، دا "ممکن د هغو افغانانو ویزې لرونکو باندې د پام وړ اغیزه وکړي چې امریکا ته د کډه کیدو په تمه دي".
شاوخوا ۲۰۰،۰۰۰ افغانان شتون لري چې د امریکا د بیا میشتیدنې لپاره منظور شوي یا د امریکا د کډوالو او ځانګړي مهاجرت ویزې غوښتنلیکونو په تمه دي.
دوی د جنوري له ۲۰ راهیسې په افغانستان او نږدې ۹۰ نورو هیوادونو کې بند پاتې دي - په شمول د شاوخوا ۲۰،۰۰۰ په پاکستان کې - کله چې ټرمپ د کډوالو د ننوتلو او د دوی د الوتنو تمویل لپاره د بهرنیو مرستو د ۹۰ ورځو لپاره د بندولو امر وکړ.
