واشنګټن او بیجینګ په دې اونۍ کې موافقه وکړه چې د جینیوا په غونډه کې د خبرو اترو وروسته د تعرفو په کچه کې د پام وړ کمښت راولي.

د امریکا ولسمشر ډونالډ ټرمپ د سه شنبې په ورځ د فاکس نیوز سره په یوه مرکه کې وویل چې واشنګټن د چین سره د یوې "ډېرې قوي" سوداګرۍ موافقې لپاره پلان لري چې د دې موافقې له مخې به د چین اقتصاد د امریکایي سوداګرو لپاره "خلاص" شي.

هغه وویل: "موږ د چین سره د یوې ډېرې قوي موافقې چوکاټ لرو. خو د دې موافقې تر ټولو هیجانوونکې برخه دا ده چې چین د امریکایي سوداګرۍ لپاره خلاصېږي." ټرمپ دا خبرې د خلیج د سفر پر مهال په ایر فورس ون الوتکه کې وکړې.

هغه زیاته کړه: "یو له هغو شیانو څخه چې زما په نظر هم زموږ لپاره او هم د چین لپاره ډېر هیجانوونکي دي، دا دي چې موږ هڅه کوو چین زمونږ د سوداګرۍ پر مخ خلاص کړو." خو هغه پدې اړه  ډیرو جزئیاتو ورکولو نه ډډه وکړه.

د آسیا ونډو بازارونه زیاتره لوړ شول، محتاطه خوښي

د چهارشنبې په ورځ د آسیا ونډو بازارونه زیاتره لوړ شول، ځکه چې د امریکا او چین ترمنځ د ۹۰ ورځو لپاره د سوداګرۍ جګړې د ځنډ په اړه د سیمې بازارونو کې محتاطه خوښي خپره شوه.

د جاپان نیکي ۲۲۵ شاخص ۰.۸ سلنه راکم شو او ۳۷,۸۷۴.۵۹ ته ورسېد. د اسټرالیا S&P/ASX 200 شاخص ۰.۱ سلنه ټیټ شو او ۸,۲۶۰.۴۰ ته ورسېد.

د سویلي کوریا کوسپي شاخص ۱.۱ سلنه لوړ شو او ۲,۶۳۵.۸۶ ته ورسېد. د هانګ کانګ هانګ سینګ شاخص ۱.۱ سلنه لوړ شو او ۲۳,۳۶۷.۵۷ ته ورسېد، په داسې حال کې چې د شانګهای مرکزي شاخص ۰.۱ سلنه لوړ شو او ۳,۳۷۷.۷۵ ته ورسېد.

نړیوال سوداګر او پانګه وال د امریکا او چین ترمنځ د سوداګرۍ د اوربند په اړه محتاطه خوښي څرګندوي، خو د دې په اړه اندېښنې شته چې دا اوربند به څومره دوام وکړي او په راتلونکو میاشتو کې تعرفې به کوم ځای ته ورسېږي.

د فېچ رېټینګز مشر اقتصادپوه براین کولټون وویل: "که دایمي موافقه شتون ونه لري، نو د تعرفو د کچې په اړه بې باوري او د هغو تعرفو اغېز چې مخکې لا پلي شوي دي، زموږ په اقتصادي وړاندوینو کې به مهم عوامل پاتې شي."