ایران ګاونډیانو ته خبرداری ورکړ که خاوره یې په برید کې وکارول شي 'دښمن' به وګڼل شي

دغه خبرداری په داسې حال کې ورکړل شوی چې د امریکا ولسمشر ټرمپ وايي، د امریکا یوه بله سمندري بیړۍ ایران ته روانه ده.

تهران له واشنګټن سره د تاوتریخوالي په ډیریدو کې د سیمه ییز یووالي غوښتنه کړې ده.

ایران خبرداری ورکړی چې که د دوی له خاورې څخه پرې برید وشي، ګاونډي هېوادونه به دښمن وبلل شي، وروسته له هغه چې د امریکا د الوتکو وړونکې بیړۍ منځني ختیځ اوبو ته ورسېده.

د اسلامي انقلاب د ساتونکي ځواک (IRGC) یوه قومندان د سه شنبې په ورځ د سیمه ییز تاوتریخوالي د زیاتوالي په ترڅ کې دا څرګندونې وکړې.

د فارس خبري اژانس د راپور له مخې، د سپاه پاسداران د سمندري ځواکونو سیاسي مرستیال محمد اکبرزاده وویل: "ګاونډي هېوادونه زموږ دوستان دي، خو که د دوی خاوره، اسمان یا اوبه د ایران پر ضد وکارول شي، دوی به دښمن وګڼل شي."

نوې سمندري بیړۍ روانه ده

دا خبرداری په داسې حال کې راغلی چې د امریکا ولسمشر ډونالډ ټرمپ ویلي دي چې د امریکا یوه بله "سمندري بیړۍ" ایران ته روانه ده او هیله یې څرګنده کړې چې تهران به له واشنګټن سره یوې معاملې ته غاړه کیږدي.

ټرمپ د سه شنبې په ورځ په یوه وینا کې وویل: "اوس مهال یوه بله ښکلې سمندري بیړۍ په ښکلي ډول ایران ته روانه ده." "زه هیله لرم چې دوی یوه معامله وکړي."

د ټرمپ دا څرګندونې په سیمه کې د امریکا د پوځي فعالیتونو له زیاتوالي وروسته شوي، چې د واشنګټن او تهران ترمنځ د احتمالي کړکېچ په اړه یې اندېښنې زیاتې کړي دي.

ایراني چارواکو په وار وار خبرداری ورکړی چې پر دغه هېواد هر ډول برید به له سخت ځواب سره مخ شي، او په ورته وخت کې یې له ګاونډیو هېوادونو غوښتي چې خپله خاوره د ایران پر ضد په هېڅ ډول پوځي اقدام کې ونه کاروي.