غزې د اوربند د هوکړې د یوې برخې په توګه د ۳۰ نورو فلسطینیانو مړي ترلاسه کړل.

د فلسطین د حقونو د ملاتړ ډله وايي، اسرائیل اوس مهال د ۷۳۵ فلسطیني بندیانو جسدونه ساتي، چې ۶۷ یې ماشومان دي.

د غزې د روغتیا وزارت وویل چې د جمعې له ورځې راهیسې د اوربند د هوکړې له پلي کېدو وروسته یې د سره صلیب د ډلو له لارې د اسرائیلو نه د ۳۰ فلسطیني بندیانو مړي ترلاسه کړي دي، چې له دې سره د ترلاسه شوو مړو شمېر ۱۲۰ ته رسېدلی دی.

وزارت د پنجشنبې په ورځ په یوه اعلامیه کې وویل چې د دوی ډلې طبي معاینات ترسره کوي څو د مړو پېژندنه، اسناد او د هغوی کورنیو ته سپارنه ترسره کړي.

تر اوسه د څلورو کسانو مړي د هغوی د کورنیو لخوا پېژندل شوي دي.

وزارت زیاته کړه: "د ځینو مړو پر بدن د وهلو، شکنجې، لاسو تړلو او سترګو پټولو نښې لیدل کیدې."

د جسدونو د سپارلو دغه بهیر د غزې د اوربند د هوکړې له مخې ترسره شو چې د جمعې په ورځ د اسراییل او حماس ترمنځ نافذ شو. د هوکړې لومړۍ مرحله د اسرائیلي یرغمل شویو خوشې کېدلو په بدل کې د فلسطیني بندیانو خوشې کول شامل وو.

د فلسطین د ملي کمپاین د شهیدانو د مړو د ترلاسه کولو په وینا، اسرائیل دا مهال د ۷۳۵ فلسطیني بندیانو مړي ساتي، چې په هغو کې ۶۷ ماشومان هم شامل دي.

د اسرائیلي ورځپاڼې هارتز په راپور کې ویل شوي چې اسرائیل د غزې شاوخوا ۱،۵۰۰ فلسطیني مړي د جنوبی اسرائیل د نیګیو صحرا په سدې تیمن پوځي اډه کې ساتي.

له اکتوبر ۲۰۲۳ کال راهیسې، د اسرائیلو بریدونو په غزه کې شاوخوا ۶۸،۰۰۰ فلسطینان وژلي، چې ډیری یې ښځې او ماشومان دي، او سیمه یې په پراخه کچه د ژوند لپاره نا امنه کړې ده.