ټرمپ: حماس به د اکتوبر په ۱۳مه نېټه ټول اسرائيلي بنديان وسپاري
د امریکا ولسمشر دا څرګندونې د اسرائيل او حماس ترمنځ د غزې د اوربند د تړون له اعلان وروسته د بنديانو له کورنیو سره د ټیلیفوني خبرو اترو په ترڅ کې وکړې.
د امریکا ولسمشر ډونالډ ټرمپ وویل چې د فلسطین د مقاومت ډله حماس به د اکتوبر په ۱۳مه نېټه په غزه کې ټول اسرائيلي بنديان خوشې کړي.
له هغې وروسته چې د اسرائيلو او حماس ترمنځ د غزې د اوربند تړون اعلان شو ټرمپ د چهارشنبې په ورځ د اسرائيلي بنديانو له کورنیو سره د ټيليفوني خبرو پر مهال دا څرګندونې وکړې.
د بنديانو خپلوانو د تړون د ترلاسه کولو لپاره د ټرمپ د هڅو مننه وکړه.
ټرمپ د ټيلیفوني خبرو پر مهال وویل چې ټول اسرائيلي بنديان به د دوشنبې په ورځ خوشې شي.
د امریکا ولسمشر په ایکس (پخوانی ټويټر) کې په یوه پوسټ کې ټینګار وکړ چې "ټول" اسرائيلي بنديان به خوشې شي.
خو ټرمپ دا روښانه نه کړه چې ایا د خوشې کېدو په لړ کې به د مړو بنديانو جسدونه هم شامل وي که نه.
ټرمپ له دې مخکې اعلان کړی و چې اسرائيلو او حماس د امریکا له لوري وړاندیز شوي د غزې د تړون لومړۍ پړاو لاسلیک کړی دی.
دغه ۲۰ ماده ييز پلان چې د سپتمبر په ۲۹مه نېټه لومړی ځل اعلان شو، د فلسطیني بندیانو په بدل کې د ټولو ا اسرائيلي بندیانو خوشې کول ، اوربند، د حماس وسلو پر ځمکه کېښودل او د غزې بیا رغونه شامل دي.
له اکتوبر ۲۰۲۳ راهیسې د اسرائيلو بریدونو په دغه محاصره سیمه کې نږدې ۶۷،۲۰۰ فلسطینیان وژلي، چې ډېری یې ښځې او ماشومان دي.
بې رحمه بمبارۍ غزه تر ډېره د نه اوسيدو وړ ګرځولي، د لوږې او ناروغۍ پراخې څپې یې رامنځته کړې دي.
