د امریکا ولسمشر ټرمپ د وینزویلا له ولسمشر مادورو سره په ټیلیفون خبرې وکړې او د احتمالي لیدنې په اړه یې بحث وکړ
دا ټیلیفوني اړیکه په داسې حال کې نیول شوې چې امریکايي ځواکونه د وینزویلا پر کښتیو بریدونه کوي او په کارابین کې خپل عملیات پراخوي.
نیویارک ټایمز ورځپاڼې د جمعې په ورځ راپور ورکړ چې د امریکا ولسمشر ډونالډ ټرمپ تېره اوونۍ د وینزویلا له ولسمشر نیکولاس مادورو سره ټیلیفوني خبرې کړې او په متحده ایالاتو کې یې د یوې احتمالي لیدنې په اړه بحث کړی دی.
دغه راپور کاږي چې دغه ټیلیفوني اړیکه په داسې حال کې ترسره شوې چې د ټرمپ اداره په کارابین کې د لویو پوځي ځواکونو په ځای پر ځای کولو سره پر وینزویلا فشار زیاتوي، چې د نړۍ تر ټولو لویه الوتکه وړونکې بېړۍ هم په کې شامله ده.
واشنګټن وايي چې د دغو عملیاتو موخه د نشه يي توکو د قاچاق مخنیوی دی، په داسې حال کې چې کاراکاس ټینګار کوي چې اصلي موخه یې د رژیم بدلون دی.
سپینې ماڼۍ د نیویارک ټایمز د هغه راپور په اړه د تبصرې غوښتنې ته سمدستي ځواب نه دی ویلی، چې په کې راغلي و چې د بهرنیو چارو وزیر مارکو روبیو هم په دې ټیلیفوني اړیکه کې برخه اخیستې وه.
د سپټمبر له پیل راهیسې، امریکايي ځواکونو د کارابین په سمندر او د ارام سمندر په ختیځ کې د وینزویلا پر څه باندې ۲۰ هغو کښتیو بریدونه کړي چې د نشه يي توکو په قاچاق تورنې وې، چې له امله یې تر ۸۰ ډېر کسان وژل شوي دي.
واشنګټن داسې کوم شواهد نه دي خپاره کړي چې وښيي په نښه شوې کښتۍ د نشه يي توکو د قاچاق لپاره کارول کېدې او یا یې متحده ایالاتو ته ګواښ پېښاوه.
د دغه پوځي کمپاین او ورسره د ځواکونو د ځای پر ځای کېدو له امله سیمه ییز تاوتریخوالی زیات شوی دی.
د ټرمپ او مادورو د ټیلیفوني اړیکې په اړه راپور یوه ورځ وروسته له هغه خپور شو، چې ټرمپ وویل د ځمکې له لارې د وینزویلا د ادعا شويو نشه يي توکو د قاچاق د مخنیوي هڅې به ډېر ژر پیل شي.
هغه امریکايي سرتېرو ته په خپلو خبرو کې وویل: "تاسو به لیدلي وي چې خلک نه غواړي د سمندر له لارې قاچاق وکړي، او موږ به ډېر ژر د ځمکې له لارې د هغوی مخه ونیسو."
"همدارنګه د ځمکې لاره اسانه ده، خو دا عملیات به ډېر ژر پیل شي."
