د تورکیې ولسمشر اردوغان وايي، تورکیې د سرې (کیمیاوي سري) زیرمې خوندي کړي او د هغو جګړو د ناوړه اغیزو د مخنیوي لپاره یې دمخه احتیاطي تدابیر نیولي چې ایران او د خلیج هیوادونه یې اغیزمن کړي دي.
د تورکیې ولسمشر رجب طیب اردوغان ویلي چې تورکیې پراخ احتیاطي تدابیر نیولي ترڅو خپل د خوراکي توکو خوندیتوب او کرنیز تولیدات د سیمه ییزو شخړو، اقلیمي خطرونو او نړیوالو بحرانونو له اغیزو څخه وژغوري.
د سې شنبې په ورځ په انقره کې د "کروندګرو د نړیوالې ورځې" په پروګرام کې د خبرو پر مهال، اردوغان وویل چې تورکیې د یوه "متوازن بهرني سیاست" له لارې په بریالیتوب سره ملي ثبات او د خوراکي توکو عرضه دواړه خوندي کړي دي.
هغه وویل: "موږ د خپل متوازن بهرني سیاست له لارې خپل هېواد او ملت له هغې 'اورنۍ کړۍ' څخه چې زموږ شاوخوا یې راګیر کړې وه وژغوره، او د خپلو ۸۶ میلیونه اتباعو لپاره مو د خوراکي توکو خوندیتوب پرته له کوم خنډه تضمین کړ."
اردوغان وویل، انقره د ایران او د خلیج د ورورنو هیوادونو د اغیزمنوونکو شخړو له پیل راهیسې بیداره پاتې شوې ترڅو ډاډ ترلاسه کړي چې کرنیز تولیدات تر منفي اغیز لاندې نه راځي.
هغه زیاته کړه: "موږ له لومړۍ ورځې راهیسې په بیدارۍ (تیارسۍ) کې وو ترڅو ډاډ ترلاسه کړو چې په ایران او زموږ د ورورنو خلیجي هیوادونو کې ژورېدونکې شخړې زموږ په کرنیزو تولیداتو اغیز نه کوي. په کرنه کې مو لا دمخه د سرې او د هغې د خامو موادو عرضه خوندي کړې وه. زموږ د سرې ذخیرې په کافي کچه دي."
د تورکیې ولسمشر وویل چې د اوبو کمښت، د اقلیم بدلون، وباګانې، جګړې او وسله والې شخړې په ټوله نړۍ کې د خوړو د خوندیتوب ستراتیژیک اهمیت پیاوړی کړی، په داسې حال کې چې د "خوراکي ملتپالنې" مفکورې په نړیواله کچه په زیاتیدونکې توګه شهرت موندلی دی.
اردوغان وویل: "موږ د تورکیې په توګه د دغو ټولو پرمختګونو په وړاندې دمخه احتیاطي تدابیر ونیول. موږ خپله پالیسي پر دې حقیقت ولاړه کړې چې 'هر څوک چې د غلو د ګودام کیلي په لاس کې لري، واک ورسره دی'."
هغه وویل، ترکیه دا مهال د هغو کرنیزو پلانونو او ملاتړي پالیسیو له امله چې د حکومت لخوا پلي شوي، د خوراکي توکو د خوندیتوب په برخه کې له هیڅ ډول ستونزې سره نه ده مخ. اردوغان زیاته کړه: "د هغو کړنو له امله چې موږ پلي کړي، په ځانګړې توګه د تولید پلان کول، موږ دا مهال د خوراکي توکو د رسولو ستونزه نلرو." هغه دا هم وویل چې د راتلونکو خطرونو د مخنیوي لپاره نوي مقررات او ملاتړي میکانیزمونه هم معرفي کیږي.
ولسمشر یادونه وکړه چې د کال له پیل راهیسې د باران کچه مناسبه وه، د اوبو زیرمې ډکې شوي او د اوبو لګولو په برخه کې کومه اندیښنه نشته. هغه هیله څرګنده کړه: "تېر کال د یخ وهنې او وچکالۍ له امله د کرنیزو محصولاتو له کمښت وروسته، هیله من یو چې سږ کال به زموږ د نباتي محصولاتو تولید یو ځل بیا زیات شي."
