یو ځانمرګي بریدګر او وسله والو د افغانستان پولې ته نږدې د پاکستان د پوځ پر یوې اډې برید کړی
پولیسو وویل، د پاکستاني طالبانو یوه ځانمرګي بریدګر د جمعې په ورځ د پاکستان په شمال لوېدیځ کې د افغانستان پولې ته نږدې د امنیتي ځواکونو پر یوه مرکز د موټر بم برید وکړ، چې له امله یې سخته نښته رامنځته شوه او درې وسله وال په کې ووژل شول.
یوه ځايي پولیس چارواکي، عرفان علي، وویل، دا برید د خیبر پښتونخوا ایالت په میرعلي ښار کې شوی دی. هغه زیاته کړه، د چاودنې له امله نږدې کورونو ته زیان اوښتی دی.
دا لا روښانه نه ده چې آیا سرتېرو ته مرګ ژوبله اوښتې که نه، او پوځ په دې اړه سمدستي څه نه دي ویلي.
دا برید څو ورځې وروسته له هغه وشو، چې پاکستان او افغانستان د څو ورځو پوله ییزو نښتو وروسته پر اوربند هوکړه وکړه؛ په دغو نښتو کې دواړو غاړو ته لسګونه کسان وژل شوي او سلګونه نور ټپیان شوي وو. دغه اوربند، چې د چهارشنبې په ورځ پیل شوی او ټاکل شوې د جمعې په ماښام پای ته ورسېږي، د "دوستو هېوادونو" په مرسته شوی و چې دواړه خواوې یې د اوربند غځولو ته هڅولې.
ځايي رسنیو راپور ورکړی چې قطر په دوحه کې د پاکستان او افغانستان ترمنځ د سولې د خبرو د کوربه توب وړاندیز کړی، که څه هم دواړو حکومتونو دا وړاندیز نه دی تایید کړی.
پاکستان د جنورۍ میاشتې راهیسې د وسله والو بریدونو له زیاتوالي سره مخ دی، چې پړه یې تر ډېره پر پاکستاني طالبانو، چې د تحریک طالبان پاکستان (TTP) په نوم پېژندل کېږي، اچول کېږي. دې کار د اسلام اباد او کابل ترمنځ اړیکې ترینګلې کړې دي، ځکه پاکستان وايي چې دغې ډلې ته په افغانستان کې پناه ورکړل شوې ده.
د سیمې د امنیتي چارواکو او پولیسو په وینا، د پاکستان پوځ په دې اونۍ کې په سیمه کې د وسله والو پر وړاندې ګڼ عملیات ترسره کړي او ۸۸ وسله وال یې وژلي دي.
د دواړو هېوادونو ترمنځ د دې اونۍ نښتې له ۲۰۲۱ کال راهیسې تر ټولو خونړۍ وې، کله چې طالبانو په افغانستان کې د لوېدیځ په ملاتړ د حکومت له ړنګېدو او د ۲۰ کلنې جګړې وروسته د امریکايي او ناټو ځواکونو له وتلو سره واک ونیو.
د تېرې اونۍ راهیسې د پولې په اوږدو کې تاوتریخوالی لوړ پاتې دی، کله چې کابل پر اسلام اباد تور ولګاوه چې د افغانستان په پلازمېنه کې یې برید کړی - دا یوه ادعا ده چې د پاکستان حکومت او پوځ نه ده منلې. خو پاکستاني امنیتي چارواکو ویلي، چې د دغه برید موخه د تحریک طالبان پاکستان د مشر، نور ولي، په نښه کول وو.
پاکستاني طالبانو د پنجشنبې په ورځ یوه ویډیو خپره کړه او ادعا یې وکړه چې ولي ژوندی دی او د پاکستان په شمال لوېدیځ کې په کوم ځای کې پټ دی.
