د پاکستان په پلازمېنه کې محکمې ودانۍ تر څېرمه خونړی ځانمرګی برید وشو چې له امله يي ۱۲ کسان وژل شوي
د اسلام اباد په ضلعي محکمه کې د یوې چاودنې له امله لږ تر لږه ۱۲ تنه مړه او ۲۷ کسان ټپیان شوي، او ویره ده چې د مرګ ژوبلې شمېر به لوړ شي. ټپیان د پمز روغتون ته لېږدول شوي او په اړه یې پلټنې روانې دي.
د سه شنبې په ورځ، د نوامبر په ۱۱، د پاکستان په پلازمېنه اسلام اباد کې د یوې محکمې بهر درنده چاودنه وشوه.
د دولتي ټلوېزیون، پي ټي وي نیوز، د راپور له مخې، قربانیان د پاکستان د طبي علومو انسټیټیوټ (پمز) روغتون ته لېږدول شوي دي.
چاودنه په یوه موټر کې شوې، چې د اسلام اباد د ضلعي محکمې دروازې ته نږدې پارک شوی و. دا سیمه معمولاً د ډېرو خلکو او دعوا کوونکو له امله ګڼه ګوڼه لري.
ځایي رسنیو د پېښې له ځایه دردونکي انځورونه خپاره کړي، چې په کې وینې بهېدلې خلک د پولیسو یوه ګاډي ته نږدې پراته ښکاري.
وکیل رستم ملک، چې د پېښې یو عیني شاهد دی، له چاودنې وروسته وویل: "کله مې چې خپل موټر پارک کړ او د محکمې ودانۍ ته ننوتم... ما په دروازه کې د یوې زورورې چاودنې غږ واورېد." د چاودنې له امله خلک په تېښته شول او په سیمه کې ګاډو ته زیان واوښت.
ملک اې اېف پي ته وویل: "بشپړه ګډوډي وه، وکیلان او خلک د محکمې ودانۍ دننه منډې وهلې. ما په دروازه کې دوه مړي ولیدل او څو موټرونو اور اخیستی و."
په اسلام اباد کې دا ترهګریز برید یوه ورځ وروسته له هغه کیږي چې د ګاونډي هېواد هند په پلازمېنه نوي ډیلي کې د موټر بم په چاودنه کې ۱۳ کسان ووژل شول. پاکستان او هند یو پر بل د ترهګریزو ډلو د ملاتړ تورونه لګوي چې د دا ډول مرګونو بریدونو تر شا دي.
