پاکستان یو ځل بیا د افغانستان د پکتیکا په ولایت هوايي بریدونه وکړل
کابل پاکستان د اوربند په ماتولو تورن کړ او ویلي دي چې د پاکستان د افغانستان پر خاوره یو ځل بیا هوايي بریدونه کړي او لږ تر لږه ۱۰ افغانان وژل شوي.
افغان چارواکو فرانس پریس اژانس ته ویلي چې پاکستان د جمعې په شپه ناوخته د افغانستان په خاوره کې هوايي بریدونه کړي، چې له امله یې لږ تر لږه ۱۰ کسان وژل شوي او هغه اوربند یې مات کړی چې پولې ته یې د دوو ورځو لپاره نسبي کراري راوستې وه.
دغه ۴۸ ساعته اوربند د نږدې یوې اونۍ هغه خونړۍ سرحدي نښتې درولې وې، چې په کې د دواړو لورو لسګونه سرتېري او ملکي وګړي وژل شوي وو.
یوه جګپوړي طالب چارواکي د نوم نه ښودلو په شرط فرانس پریس اژانس ته ویلي: "پاکستان اوربند مات کړی او د پکتیکا ولایت په دریو سیمو یې بمباري کړې ده." هغه زیاته کړه: "افغانستان به یې بالمثل ځواب ووايي."
د پکتیکا د ولایتي روغتون یوه چارواکي د نوم نه ښودلو په شرط فرانس پریس اژانس ته ویلي چې په دغو بریدونو کې ۱۰ ملکي وګړي وژل شوي او ۱۲ نور ټپیان دي، او زیاته یې کړه چې په وژل شویو کې دوه ماشومان هم شامل دي.
د افغانستان کرکټ بورډ فرانس پریس اژانس ته ویلي چې په سیمه کې د یوې ټورنمنټ لپاره موجود درې لوبغاړي وژل شوي.
دې ادارې دا هم ویلي چې له هغې درې اړخیزې شل اووریزې سیالۍ څخه خپل نوم باسي چې ټاکل شوې راتلونکې میاشت ترسره شي او پاکستان هم په کې شامل دی.
په پاکستان کې یوه جګپوړي امنیتي چارواکي فرانس پریس اژانس ته ویلي چې ځواکونو یې د افغانستان په سرحدي سیمو کې "دقیق هوايي بریدونه" ترسره کړي چې هدف یې د حافظ ګل بهادر ډله وه چې له تحریک طالبان پاکستان (TTP) یا پاکستاني طالبانو سره تړاو لري.
اسلام اباد ویلي چې همدا ډله له افغانستان سره په پوله پراته شمالي وزیرستان کې پر یوې پوځي اډې په ځانمرګي او وسله وال برید کې ښکېله وه، چې له امله یې اووه پاکستاني پوځي سرتېري وژل شوي وو.
