نایجیریا له ډېرې مودې راهیسې د هېواد په بېلابېلو برخو کې د بوکو حرام توندلارې ډلې او له داعش سره تړلې ISWAP په ګډون د وسله والو ډلو له بریدونو سره لاس او ګرېوان ده.
ولسمشر ډونالډ ټرمپ د جمعې په وروستیو کې اعلان وکړ چې د امریکا او نایجیریا په ګډو پوځي عملیاتو کې د ادعا له مخې په نړۍ کې د داعش دویم لوړپوړی مشر وژل شوی دی.
ټرمپ پر خپل ټروت سوشل (Truth Social) پلټفارم ولیکل: "نن شپه، زما په لارښوونه، زړورو امریکایي ځواکونو او د نایجیریا وسله والو ځواکونو په بې نیمګړتیا توګه یو ډېر دقیق پلان شوی او خورا پېچلی ماموریت اجرا کړ ترڅو د نړۍ تر ټولو فعال ترهګر د جګړې له ډګر څخه لرې کړي."
ټرمپ وویل ابو بلال المینوکي "فکر کاوه چې په افریقا کې پټېدای شي،" خو ادعا یې وکړه چې امریکایي استخباراتي سرچینو د هغه تګ راتګ تعقیب کړی و.
هغه وویل: "هغه به نور د افریقا خلک ونه ترهوي، یا پر امریکایانو د بریدونو لپاره د عملیاتو په پلانولو کې مرسته ونه کړي،" او زیاته یې کړه چې د هغه له منځه وړلو وروسته د داعش نړیوال عملیات "خورا کمزوري شوي دي."
هغه همداراز د نایجیریا له حکومت څخه په دغو عملیاتو کې د شراکت له امله مننه وکړه.
نایجیریا له ډېرې مودې راهیسې د هېواد په بېلابېلو برخو کې د بوکو حرام توندلارې ډلې او له داعش سره تړلې ISWAP په ګډون د وسله والو ډلو له بریدونو سره لاس او ګرېوان ده.
حکومت د دغه ګواښ د له منځه وړلو لپاره ګامونه اخیستي، چې پکې د سرتېرو ځای پر ځای کول او له نړیوالو شریکانو سره کار کول شامل دي.
د فبرورۍ په میاشت کې، امریکا شاوخوا ۱۰۰ پوځي پرسونل د نایجیریا شمال ته ولېږل ترڅو د وسله والو ډلو د بریدونو د زیاتېدو پر مهال ځايي ځواکونو ته روزنه، د استخباراتي معلوماتو شریکول او تخنیکي ملاتړ ورکړي.
