ټرمپ ویلي چې د ایران له وړاندیزه خوښ نه دی، خو بیاکتنه به پرې وکړي.

د اکسیوس د شنبې د ورځې د یوه راپور له مخې، ایران د هرمز تنګي د بیا پرانیستلو، د امریکا د سمندري محاصرې د پای ته رسولو او په ایران او لبنان کې د جګړې د دایمي پای لپاره د یوې هوکړې په اړه د خبرو اترو لپاره یوه میاشتنۍ نېټه ټاکلې ده.

تهران د پنجشنبې په ورځ واشنګټن ته د یوه چوکاټیز تړون لپاره ۱۴ ماده‌ییز تعدیل شوی وړاندیز سپارلی دی.

دوه سرچینو چې د دې سند په اړه ورته معلومات ورکړل شوي، ویلي چې په دې کې د یوې داسې هوکړې د خوندي کولو لپاره د یوې میاشتې سخت مهال وېش په ګوته شوی، چې سمندري لاسرسی، د امریکا د سمندري محاصرې پای، او په دواړو جبهو کې یو پایښت لرونکی اوربند پکې شامل وي.

د امریکا ولسمشر ډونالډ ټرمپ د شنبې په ورځ خبریالانو ته د دې پوښتنې په ځواب کې چې ایا هغه د نویو بریدونو امر کولی شي، وویل: "که هغوی ناسمه رویه وکړي، که کوم بد کار وکړي، خو همدا اوس به وګورو. دا یو امکان دی چې یقیناً پېښېدای شي."

د سرچینو په وینا، دا وړاندیز یوازې د لومړنۍ هوکړې له لاسلیک کېدو وروسته دویم پړاو په پام کې نیسي، چې د اټومي پروګرام په اړه به د یوې بلې میاشتې لپاره خبرې اترې پیل شي.

که څه هم ټرمپ د جمعې په ورځ ویلي و چې د ایران له وړاندیزه ناخوښ دی، خو د شنبې په ورځ یې له پام بیچ څخه میامي ته تر تګ مخکې خبریالانو ته وویل چې د الوتنې پر مهال به پرې بیاکتنه وکړي.

هغه وویل: "زه یې ګورم. وروسته به یې په اړه درته خبر درکړم."

هغه زیاته کړه: "هغوی ماته د هوکړې د مفهوم په اړه ویلي. اوس به یې کره متن راکړي."

څو شېبې وروسته، ټرمپ په 'ټروت سوشل' ټولنیزه شبکه کې خورا توند غبرګون وښود او ویې ویل، "زه تصور نه شم کولی چې دا به د منلو وړ وي" او ټینګار یې وکړ چې ایران "تر اوسه د هغه څه لپاره چې په تېرو ۴۷ کلونو کې یې له بشریت او نړۍ سره کړي، کافي بیه نه ده پرې کړې."

رسنیو ته په همدې څرګندونو کې، ټرمپ د ایران پر بندرونو لګېدلې محاصره یوه "ډېره دوستانه" او نادر اقدام وباله، او په دې خبره یې ټینګار وکړ چې دا د هغه له دې ادعا سره په ټکر کې نه ده چې دښمني "پای ته رسېدلې" ده.