د پاکستاني رسنیو د راپور له مخې، د پاکستان د ترهګرۍ پر وړاندې د مبارزې ادارې (CTD) د هغه چاودنې په اړه څرګندونې کړې دي چې پرون په خیبر پښتونخوا کې د جمعې د لمانځه پر مهال د جومات ترڅنګ رامنځته شوې.

په بیان کې ویل شوي چې په دغه برید کې د ۱۷ پولیسو او ۶ ملکیانو په ګډون ۲۳ کسانو خپل ژوند له لاسه ورکړی او له ۱۰۰ څخه ډېر کسان ټپیان شوي دي.

د خیبر پښتونخوا پولیسو په یوه بیان کې همدا راز ویلي چې له برید وروسته د شپې لخوا پیل شوي عملیات پای ته رسېدلي او ۸ بریدګر وژل شوي دي.

د خیبر پښتونخوا د پولیسو مشر ذوالفقار حمید پرون ویلي وو، چې د خیبر پښتونخوا په کوهاټ سیمه کې د پولیسو د مرکزي دفتر د انګړ په دروازه کې د یوه جومات ترڅنګ له چاودېدونکو توکو ډک موټر چاودنه کړې ده.

حمید یادونه کړې وه چې له برید وروسته د ترهګرو او امنیتي ځواکونو ترمنځ نښته پیل شوه او په همدې مهال د انګړ دننه دوهم بمي برید هم ترسره شو.

امنیتي چارواکو ویلي وو چې دغې زورورې چاودنې د جومات په بهرنۍ برخه کې یوه کنده جوړه کړې، بهرنۍ برخه یې سخته زیانمنه شوې او یو دېوال یې نړېدلی دی.

له پېښې وروسته د کوهاټ - هنګو سړک، چېرې چې چاودنه شوې وه، د ترافیکو پر مخ تړل شوی او د کوهاټ په مرکزي روغتون کې بېړنی حالت اعلان شوی و.

د دغه برید مسوولیت د حافظ ګل بهادر ډلې پر غاړه اخیستی، چې د پاکستاني طالبانو (ټي ټي پي) سره تړاو لري، کومه چې د پاکستان دولت لخوا د یوې ترهګرې ډلې په توګه پېژندل کېږي.

په پاکستان کې دغه برید د ترکیې په ګډون د ګڼو هېوادونو او د ملګرو ملتونو د سرمنشي انتونیو ګوتریش په شمول یو شمېر چارواکو غندلی دی.

- د پاکستان د ترهګرۍ ستونزه

په پاکستان کې وسله وال بریدونه په ځانګړې توګه په خیبر پښتونخوا او بلوچستان ایالتونو کې ډېر شوي دي.

په دواړو ایالتونو کې وسله والې ډلې چې د پښتنو او بلوڅو توکمونو د حقونو د دفاع ادعا کوي، پر پاکستاني امنیتي ځواکونو او ملکي وګړو بریدونه ترسره کوي.

اسلام اباد ادعا کوي چې ټي ټي پي په افغانستان کې پټنځایونه لري او له هغه ځایه خپل بریدونه تنظیموي، خو د افغانستان حکومت دا ادعاوې ردوي.

په بلوچستان کې بیا د بلوچستان د ازادي غوښتونکي پوځ  بریدونه تر سترګو کېږي. له پاکستان څخه د بلوچستان ایالت بېلېدل غواړي او دا غوښتنه کوي چې بلوڅان دې پر خپله سیمه واکمني وکړي.