ملګري ملتونه وايي چې په وینزویلا کې د امریکا مداخله نړیوال قانون تر پښو لاندې کړی دی
ملګرو ملتونو خبرداری ورکړی چې په کاراکاس کې د واشنګټن اقدامات د وینزویلا د کړکیچ د لا خرابیدو خطر لري او په ورته وخت کې د ځواک د یو اړخیز استعمال لپاره یو خطرناک مثال جوړوي.
ملګرو ملتونو په وینزویلا کې د امریکا د ډراماتیکې مداخلې په اړه ژوره اندېښنه څرګنده کړې او خبرداری یې ورکړی چې دې اقدام په ښکاره ډول «د نړیوال قانون یو بنسټیز اصل کمزوری کړی دی».
د ملګرو ملتونو د بشري حقونو د دفتر ویاندې، راوینا شمداستاني، د سې شنبې په ورځ په جینوا کې خبریالانو ته وویل: «هیڅ دولت باید د بل دولت د ځمکنۍ بشپړتیا یا سیاسي خپلواکۍ پر وړاندې ګواښ یا ځواک ونه کاروي.»
د هغې څرګندونې وروسته له هغې وشوې چې د وینزویلا ولسمشر نیکولاس مادورو او د هغه میرمن سیلیا فلورس د شنبې په سهار د وینزویلا په پلازمینه کې د هوایي بریدونو په جریان کې د جنګي الوتکو او درنو سمندري ځواکونو لخوا وتښتول شول.
شمداستاني د یادې حملې لپاره د امریکا هغه توجیهات رد کړل چې د وینزویلا د حکومت «اوږدمهاله او بوږنوونکو بشري حقونو سرغړونو» ته یې اشاره کوله.
هغې ټینګار وکړ: «د بشري حقونو د سرغړونو حساب ورکونه د نړیوال قانون د سرغړونې په ترڅ کې د یو اړخیزې پوځي مداخلې له لارې نه شي ترلاسه کېدای.»
هغې یادونه وکړه چې د ملګرو ملتونو د بشري حقونو دفتر د یوې لسیزې راهیسې په پرلهپسې ډول په وینزویلا کې د «وضعیت د دوامداره خرابېدو» راپورونه ورکړي دي.
هغې وویل: «موږ ویره لرو چې د امریکا د مداخلې له امله رامنځته شوې اوسنی بې ثباتي او په هېواد کې لا ډېره پوځي کېدنه به وضعیت نور هم خراب کړي.»
