ټرمپ د ګرینلنډ پر سر ۸ اروپايي هېوادونو ته د تعرفو ګواښ وکړ

ټرمپ وایي، ډنمارک، ناروې، سویډن، فرانسه، جرمني، برتانیا، هالنډ او فنلنډ به د فبروري له لومړۍ نېټې له ۱۰ سلنه او د جون له لومړۍ نېټې له ۲۵ سلنه تعرفو سره مخ شي، او لامل یې له ګرینلنډ سره تړلې 'ملي امنیتي' اندېښنې په ګوته کړې.

ټرمپ پر خپله ټولنیزه شبکه 'ټروت سوشل' په یوه پوسټ کې ویلي چې له ډنمارک، ناروې، سویډن، فرانسې، جرمني، برتانیا، هالنډ او فنلنډ څخه پر وارداتو به له راتلونکې میاشتې ۱۰ سلنه تعرفه ولګول شي، چې د جون په لومړۍ نېټه به ۲۵ سلنې ته لوړه شي.

هغه وویل، دا اقدامات به تر هغه وخته پر ځای وي چې "د ګرینلنډ د بشپړ او ټولیز پیرود" لپاره یوه هوکړه وشي.

"د امریکا لپاره ملي امنیت"

ټرمپ له ډېرې مودې راهیسې له ډنمارک څخه د ګرینلنډ د اخیستلو په اړه د امریکا پر نیت ټینګار کړی، او استدلال کوي چې واشنګټن د "ملي امنیت" په ګټه دې خپلواکې ارکټیک سیمې ته اړتیا لري.

هغه وویل، "نړیواله سوله په خطر کې ده! چین او روسیه ګرینلنډ غواړي، او ډنمارک یې په اړه هیڅ هم نشي کولی."

ټرمپ ټینګار وکړ چې که څه هم امریکا له ډنمارک او نورو هېوادونو سره خبرو اترو ته چمتو ده، خو د "نړیوالې سولې او امنیت" د ساتنې لپاره "کلک اقدامات" اړین وو.