د امریکا سناتور رینډ پال ویلي چې ده په اساسي قانون کې یو داسې تعدیل وړاندې کړی چې موخه یې په امریکا کې د هغو ماشومانو لپاره د زیږون له لارې د اتوماتیک تابعیت حق ختمول دي چې میندې او پلرونه یې غیرقانوني کډوال وي.
رېنډ پال د دوشنبې په ورځ پر ایکس (پخواني ټویټر) ولیکل: "ما د زیږون له لارې د تابعیت د پای ته رسولو لپاره په اساسي قانون کې تعدیل وړاندې کړ." هغه زیاته کړه: "د اساسي قانون ۱۴م تعدیل هیڅکله د دې لپاره نه و چې غیرقانوني ننوتلو ته انعام ورکړي."
دغه کینټکي مېشتي سناتور د قانوني او غیرقانوني کډوالۍ ترمنځ توپیر وکړ او ادعا یې وکړه چې قانوني کډوالۍ په تاریخي ډول امریکا پیاوړې کړې، خو غیرقانوني کډوالي له سیستم څخه د ناوړه ګټې اخیستنې لپاره کارول کېږي.
پال وویل: "قانوني کډوالۍ دا هېواد جوړ کړی دی. خو له غیرقانوني کډوالۍ څخه د سیستم د غولولو لپاره کار اخیستل کېږي. یوازې د هغو کسانو ماشومان باید اتوماتیک تابعیت ترلاسه کړي چې په قانوني ډول دلته اوسېږي."
ولسمشر ډونالډ ټرمپ تېر کال واک ته له رسېدو لږ وروسته یو اجراییوي فرمان صادر کړی و چې غوښتل یې هغو ماشومانو ته د تابعیت ورکولو پخوانۍ لړۍ پای ته ورسوي چې میندې یې بې اسناده (غیرقانوني) کډوالې وي. خو دغه فرمان سمدستي د مدني حقونو د ډلو او د امریکا د څو ایالتونو له لوري په محکمو کې له قانوني ننګونو سره مخ شو.
د متحده ایالاتو د اساسي قانون ۱۴م تعدیل، چې په ۱۸۶۸ کال کې تر کورنۍ جګړې وروسته تصویب شو، وايي چې ټول هغه کسان چې په امریکا کې زېږېدلي یا یې تابعیت اخیستی او د دې هېواد د قوانینو تابع وي، امریکایي اتباع دي.
