د ټرمپ دغه تازه څرګندونې په داسې حال کې دي چې ایران ټینګار کړی، چې د خپلو غني شویو یورانیمو زېرمې به "هېڅ ځای ته" ونه لېږدوي.
د امریکا ولسمشر ډونلډ ټرمپ یو ځل بیا خپله ادعا تکرار کړې چې د سولې د هر ډول تړون له مخې به د امریکا متحده ایالات او ایران په ګډه د کیندونکو ماشینونو په کارولو سره د تهران له اټومي تاسیساتو څخه یورانیم راوباسي، او وروسته به دا مواد د امریکا خاورې ته ولېږدوي.
د ټرمپ دغه څرګندونې د جمعې په ورځ په داسې حال کې دي چې د ایران د بهرنیو چارو وزارت مخکې ویلي وو چې د تهران د غني شویو یورانیمو زېرمه به "هېڅ ځای ته" ونه لېږدول شي.
ټرمپ د اریزونا ایالت په فینکس ښار کې د "ټرنینګ پواینټ یو اېس اې" په نوم محافظه کار خوځښت یوې غونډې ته وویل: "چا وپوښتل، چې موږ به دا هستوي ګرد څنګه ترلاسه کړو؟ موږ به له ایران سره په ګډه د ګڼو کیندونکو ماشینونو په وسیله لاړ شو او دا به ترلاسه کړو."
هغه زیاته کړه، "موږ تر ټولو لویو کیندونکو ماشینونو ته اړتیا لرو چې تاسو یې تصور کولی شئ."
"خو موږ به له ایران سره په ګډه ورشو. موږ به دا مواد ترلاسه کړو او ډېر ژر به یې بېرته امریکا ته خپل کور ته یوسو."
د ټرمپ دغه تازه څرګندونې په داسې حال کې دي چې ایران ټینګار کړی، چې د خپلو غني شویو یورانیمو زېرمې به "هېڅ ځای ته" ونه لېږدوي.
د لبنان او اسرائیل اوربند
د ټرمپ دا خبرې د پنجشنبې د ورځې د هغې ادعا تشریح وه چې ګواکې ایران د خپلو غني شویو یورانیمو پر سپارلو هوکړه کړې، خو د دې لېږد په اړه یې هېڅ جزئیات نه وو ورکړي.
د امریکا مشر په منظمه توګه د "هستوي ګرد" اصطلاح د ایران د غني شویو یورانیمو زېرمو ته کاروي، چې امریکا پر ایران تور لګوي چې د اټومي بم جوړولو لپاره یې ساتي.
خو هغه کله ناکله دا اصطلاح هغو موادو ته هم کارولې چې تېر کال په جون میاشت کې د ایران پر اټومي تاسیساتو د امریکا له بریدونو وروسته پاتې شوي وو.
ټرمپ د جمعې په ورځ له ایران سره د سولې د تړون د چانسونو په اړه ډېر خوشبین برېښېده، او د فرانسې خبري اژانس ته یې وویل چې "هېڅ خنډ" نشته او تړون "ډېر نږدې" دی.
د ایران په اړه د هغه دا څرګندونې "ټرنینګ پواینټ یو اېس اې" ته د وینا پر مهال وې، چېرته چې هغه د ایریکا کرک لخوا معرفي شو. ایریکا د دې ډلې د بنسټګر چارلي کرک کونډه ده - چې د ټرمپ ملګری و او د سپټمبر په میاشت کې ووژل شو.
ټرمپ د ناټو پر پوځي تړون هم نیوکه وکړه او ویې ویل چې امریکا اوس مهال د هغوی مرستې ته اړتیا نه لري. هغه د لبنان او اسرائیل اوربند هم وستایه، چې د هغه په وینا "له ۷۸ کلونو وروسته رامنځته شو"، او زیاته یې کړه چې امریکا به "لبنان بیا ستر کړي."
