ټرمپ کولمبیا او د هغه ولسمشر ته د "خورا جدي اقدام" خبرداری ورکړ

د کولمبیا ولسمشر پیټرو په ځواب کې ویلي چې هغه به د ټرمپ د تورونو په وړاندې د امریکا په محکمو کې له ځانه په قانوني توګه دفاع وکړي.

د امریکا ولسمشر ډونالډ ټرمپ په سپینه ماڼۍ کې خبریالانو ته وویل چې ممکن د مخدره توکو په قاچاق کې د ادعا شوي رول له امله د کولمبیا په وړاندې "خورا جدي اقدام" وکړي.

ټرمپ د چهارشنبې په ورځ په سپینه ماڼۍ کې خبریالانو ته وویل: "هغه (ولسمشر ګوستاوو پیټرو) یو بدمعاش او بد سړی دی. هغه داسې څوک دی چې ډېر مخدره توکي یې جوړ کړي دي. موږ له نن ورځې راهیسې کولمبیا ته ټول تادیات بند کړي دي."

ټرمپ وویل چې پیټرو د خپل هیواد لپاره خورا خراب کار کړی، او ادعا یې وکړه چې هغوی د کوکاینو کارخانې لري.

ټرمپ زیاته کړه: "موږ به د هغه او د هغه د هیواد په وړاندې خورا جدي اقدام وکړو. هغه خپل هیواد د مرګ کندې ته بیولی دی."

'زه به له ځانه دفاع وکړم'

د ټرمپ له څرګندونو لږ وروسته، پیټرو په ځواب کې وویل چې هغه به په امریکا کې د امریکایي ولسمشر د تورونو په وړاندې له ځانه په قانوني توګه دفاع وکړي.

پیټرو په ټولنیزه شبکه اېکس (X) کې ولیکل: "د هغو تورونو په وړاندې چې د متحده ایالاتو په خاوره کې د لوړ پوړو چارواکو لخوا پر ما لګول شوي، زه به د امریکایي وکیلانو په مرسته د امریکا په قضایي سیسټم کې له ځانه دفاع وکړم."

هغه زیاته کړه: "زه به تل په کارابین کې د واکمنانو لخوا د نسل وژنې او وژنو په وړاندې ودرېږم."

پیټرو دا هم وویل چې کله د کولمبیا مرستې ته اړتیا وي، دوی به د مخدره توکو له قاچاق سره مبارزه وکړي، او ویې ویل چې دوی به له هغو دولتونو سره د مخدره توکو د قاچاق وړونکو پر وړاندې مبارزه وکړي چې د دوی مرسته غواړي.

پیټرو وویل: "کله چې زموږ مرستې ته د مخدره توکو د قاچاق پروړاندې د مبارزې لپاره اړتیا وي، امریکایي ټولنه به یې ولري. موږ به له هغو دولتونو سره چې زموږ مرسته غواړي د مخدره توکو د قاچاق وړونکو پر وړاندې مبارزه وکړو."