افغان چارواکي: د پاکستان لخوا د قندهار په سپین بولدک باندې په بریدونو کې ۱۲ تنه شهیدان او تر ۱۰۰ ډیر ملکي وګړي ټپیان شوي دي.

افغان چارواکو د چهارشنبې په ورځ فرانس پریس اژانس ته ویلي، چې د افغانستان او پاکستان ترمنځ پر پوله په تازه نښتو کې پنځلس ملکي وګړي وژل شوي او لسګونه نور ټپیان دي.

د قندهار ولایت د  اطلاعاتو ریاست د ویاند، علي محمد حقمل په وینا، نښتې تېره شپه د افغانستان په جنوبي ولسوالۍ سپین بولدک کې پیل شوې، چې په کې د نوموړي په خبره ۱۵ ملکي وګړي وژل شوي دي.

د سپین بولدک ولسوالۍ د روغتون یوه چارواکي، عبدل جان بارک فرانس پریس اژانس ته دا شمېر تایید کړی او ویلي یې دي چې تر ۸۰ ډېرې ښځې او ماشومان ټپیان شوي دي.

د طالبانو د حکومت ویاند ذبیح الله مجاهد پر پاکستاني ځواکونو تور لګولی چې "یو ځل بیا" یې په سپین بولدک ولسوالۍ کې "په سپکو او درنو وسلو" بریدونه کړي دي.

مجاهد په یوه اعلامیه کې ویلي چې ۱۲ ملکي وګړي شهیدان شوي او ۱۰۰ نور ټپیان دي. په اعلامیه کې د امنیتي ځواکونو د مرګ ژوبلې یادونه نه ده شوې.

خو په اعلامیه کې ویل شوي چې په سیمه کې اوس نښتې پایته ورسیدلي دي، افغان ځواکونه ټول متجاوز  پاکستاني سرتېري وژلي او پوستې او وسلې یې ترینه نیولي دي.

د فرانس پریس اژانس خبریال راپور ورکړی چې په سیمه کې ټول کاروبارونه تړلي دي او ډېری اوسېدونکي تښتېدلي دي.

پاکستان سمدستي څه نه دي ویلي، خو امنیتي سرچینو ویلي چې دوی د کرمې ولسوالۍ له لوري، چې تر سپین بولدک شمال لوري ته پرته ده، افغان پوستې په نښه کړي دي.

دا نوی تاوتریخوالی په داسې حال کې رامنځته شوی چې د دواړو ګاونډیو هېوادونو ترمنځ د امنیتي مسایلو له امله کړکېچ ډېر شوی او اسلام اباد پر افغانستان تور لګوي چې د پاکستاني طالبانو (TTP) په مشرۍ وسله والو ډلو ته پناه ورکوي.

نښتې لومړی د شنبې په ماښام هغه مهال پیل شوې، کله چې کابل د پولې په اوږدو کې په لږ تر لږه پنځو ولایتونو کې عملیات پیل کړل.

د طالبانو حکومت وویل، دوی پر پاکستاني امنیتي ځواکونو د هغو هوايي بریدونو په غچ کې برید کړی چې "پاکستاني پوځ پر کابل" کړي وو. دا بریدونه د پنجشنبې په ورځ په افغان پلازمېنه کې له هغو چاودنو وروسته وشول چې مسؤلیت یې چا ونه مانه.

اسلام اباد د یکشنبې په ورځ د کلک ځواب ورکولو ژمنه وکړه، او دواړو لورو ته د لسګونو کسانو د مرګ ژوبلې راپورونه ورکړل شول.