امریکا متحده ایالاتو له ایران سره د کړکېچ په ترڅ کې منځني ختیځ ته یوه بله جنګي بېړۍ واستوله.

د امریکا ولسمشر ډونلډ ټرمپ هیله لري چې دا پراخ نظامي حضور به تهران د خبرو اترو میز ته راکش کړي.

د سي بي ایس (CBS) خبري شبکې د پنجشنبې په ورځ راپور ورکړ چې وروسته له هغه چې ولسمشر ټرمپ وویل چې یو "لوی سمندري لښکر" د ایران په لور د حرکت په حال کې دی، واشنګټن سیمې ته یوه بله جنګي بېړۍ هم واستوله. دغه شبکه وايي چې دا بېړۍ USS Delbert D. Black نومېږي، چې د "ارلي برک" کلاس د توغندیو ضد دفاعي سیسټم لرونکې ویجاړونکې بېړۍ ده.

نورې امریکایي بېړۍ چې دا مهال د امریکا د مرکزي قوماندانۍ (CENTCOM) تر څارنې لاندې په سیمه کې دي، د الوتکو وړونکې بېړۍ USS Abraham Lincoln، پنځه نورې ویجاړونکې بېړۍ او درې ساحلي جنګي بېړۍ پکې شاملې دي. پنټاګون په چټکۍ سره د الوتکو وړونکې بېړۍ ضربتي ډله، پرمختللي جنګي جټ الوتکې او د توغندیو ضد دفاعي بیټرۍ په سیمه کې ځای پر ځای کوي، چې دا د تهران سره د زیات شوي کړکېچ په پایله کې د سیمه ییز نظامي ځواک په جوړښت کې یو لوی بدلون دی.

ټرمپ د چهارشنبې په ورځ یو ځل بیا ټینګار وکړ چې یو "لوی سمندري لښکر" د ایران په لور روان دی. د دفاع وزیر پیټ هګسیټ وویل چې واشنګټن چمتو دی ترڅو د ایران د اټومي وسلو د مخنیوي لپاره له "ټولو انتخابونو" کار واخلي، خو ټینګار یې وکړ چې لا هم د ډیپلوماتیکې هوکړې لپاره ځای شتون لري. ورته مهال، د ایران اردو خبرداری ورکړی چې هر ډول برید ته به په "پرېکنده او چټک ځواب" سره غبرګون وښيي.