د تورکیې ولسمشر رجب طیب اردوغان د چهارشنبې په ورځ وویل چې په سوریه او لبنان د اسرائیلو بریدونه داسې کچې ته رسېدلي چې تورکیه هم ګواښي. هغه زیاته کړه چې د اسرائیلو «تېری» ټولې نړۍ ته یو ګواښ دی او باید ودرول شي.
اردوغان په پارلمان کې وکیلانو ته د وینا پر مهال، وویل د اسرائیلو دا ډول اقدامات کولی شي د مدیترانې په ختیځ او ټوله سیمه کې بې ثباتي نوره هم زیاته کړي.
هغه وویل: "د تورکیې امنیت له هاتای څخه نه، بلکې له حلب، دمشق او بیروت څخه پیلېږي. موږ به نه د خپلو وروڼو په هېوادونو کې کوم تحمیل شوی عمل (امر واقع) وزغمو او نه به هم پر تېري سترګې پټې کړو." هغه ټینګار وکړ چې د هېواد امنیت یې له پولو هاخوا غځېدلی دی.
ولسمشر اردوغان همدارنګه د اسرائیلیانو د «موعودې ځمکې ادعا» یو خیال وباله او ویې ویل چې تورکیه د هغوی له اصلي هدف څخه پوره خبره ده. هغه زیاته کړه: "د خدای په مرسته ، موږ به هیڅکله د دې اجازه ورنکړو."
اردوغان نورو هېوادونو ته خبرداری ورکړ چې له اسرائیلو سره ملګري نشي: "هیڅوک باید د خطرناکو لوبو په لټه کې نشي. هیڅوک باید د صهیونیسټي قتلعام د شبکې د خپو پلونه ونه څاري."
ولسمشر اردوغان خبرداری ورکړ چې د اسرائیلو د کړنو په مخنیوي کې پاتې راتلل به د سیمې او نړیوالې ټولنې لپاره جدي پایلې ولري. هغه وویل: "که د اسرائیلو دغه زورواکي ونه درول شي، نو له سیمې سره یوځای به ټوله نړۍ د دې پایلې وګالي."
"اسرائیل باید ودرول شي. دا د انسانیت دنده ده... باید اجازه ورنکړل شي چې تاریخ تکرار شي."
اردوغان دا خبرداری هم ورکړ چې تورکیه به د مدیترانې په ختیځ کې د خپلو اتباعو یا د قبرس د ترکانو د حقونو په نښه کولو ته کلک ځواب ورکړي: "که په ختیځه مدیترانه کې د ترکیې او د قبرس د ترکانو حقونه په نښه شي، زه غواړم دا روښانه وي چې زموږ ځواب به خورا روښانه او خورا سخت وي."
