کریملین: روسیه د امریکا له خوا پر هند د تعرفو ګواښونه “مشروع” نه ګڼي

د کریملین ویاند وايي، خپلواک هېوادونه حق لري چې د خپلو ګټو پر بنسټ د سوداګرۍ او اقتصادي همکاریو لپاره خپل شریکان وټاکي.

کریملین ویلي چې مسکو د امریکا د ولسمشر ډونالډ ټرمپ له خوا هند ته د روسیې د تېلو د اخیستلو په تړاو د لوړو تعرفو د لګولو ګواښونه “قانوني” نه ګڼي.

د کریملین ویاند دیمتري پېسکوف د سه‌ شنبې په ورځ خبریالانو ته په یوه خبري غونډه کې وویل: “موږ ډيري داسې څرګندونې اورو چې په حقیقت کې ګواښونه دي. هڅې کېږي چې هېوادونه اړ شي له روسیې سره سوداګري بنده کړي. موږ دا ډول څرګندونې مشروع نه ګڼو.” پېسکوف دا خبرې د هند د بهرنیو چارو وزارت د هغه بیان په اړه وکړې چې د ټرمپ د وروستیو څرګندونو په غبرګون کې خپور شوی و.

پیسکوف زیاته کړه چې خپلواک هېوادونه حق لري چې د خپلو ګټو پر بنسټ د سوداګرۍ او اقتصادي همکاریو لپاره خپل شریکان وټاکي.

ټرمپ د یکشنبې په ورځ په ټروت سوشیل پليټ فارم کې لیکلي و چې دی به پر هند لوړې تعرفې ولګوي، او پر نوي ډهلي یې تور پورې کړ چې د روسیې د تېلو له بیا پلورلو څخه ګټه اخلي.

امریکايي ولسمشر پرته له دې چې د تعرفې د لوړولو د کچې یا وخت په اړه نور جزییات ورکړي، ویلي و: “هغوی ته مهمه نه ده چې په اوکراین کې د روسیې د جنګي ماشین له خوا څومره خلک وژل کېږي. له همدې امله زه به د هند لخوا امریکا ته ورکول کېدونکې تعرفه په پراخه کچه لوړه کړم.”

په ځواب کې، د هند د بهرنیو چارو وزارت ویاند رندیر جایسوال د دوشنبې په ورځ لیکلي چې د مسکو او کیف ترمنځ د روانې جګړې په پیل کې امریکا پخپله هڅه کوله چې هند له روسیې نه واردات وکړي، څو “د نړیوالو انرژي بازارونو ثبات پیاوړی” کړي.

وزارت په خپل بیان کې ویلي: “هند د امریکا او اروپايي ټولنې له خوا له هغه وروسته چې د اوکراین جګړه پیل شوه، د روسیې د تېلو د وارداتو له امله په نښه شوی دی”، او دا یې “بې ‌دلیله او غیرمنطقي” بللي دي.

بیان کې دا هم زیاته شوې: “د هر لوی اقتصاد په څیر، هند به هم د خپلو ملي ګټو او اقتصادي امنیت د خوندي کولو لپاره ټول لازم ګامونه پورته کړي.”