د اسرائیلو په برید کې د دریو ماشومانو په ګډون پنځه لبنانیان ووژل شول
د لبنان د روغتیا وزارت وویل، د یکشنبې په ورځ د لبنان په جنوبي ښارګوټي بنت جبیل کې د اسرائیلو د بې پیلوټه الوتکې په برید کې د دریو ماشومانو په ګډون پنځه کسان وژل شوي دي. د پارلمان رئیس نبیه بري ویلي چې په وژل شویو کې څلور تنه، چې درې ماشومان او د هغوی پلار دي، د امریکا تابعیت درلود.
په دې برید کې دوه نور کسان، چې د کورنۍ مور هم په کې شامله ده، ټپیان شوي دي. په بیروت کې د امریکا سفارت له چارواکو سره سمدستي د تبصرې لپاره اړیکه ونه نیول شوه.
دا برید په داسې حال کې شوی چې اسرائیلو د نوامبر میاشتې راهیسې، کله چې د امریکا په منځګړیتوب د لبنان او اسرائیلو ترمنځ اوربند نافذ شو، په پرله پسې ډول په جنوبي لبنان کې د حزب الله په نوم مواضع په نښه کړي دي. دغه اوربند په غزه کې د اسرائیلو د جګړې له امله تر یو کال اوږدې جګړې وروسته رامنځته شوی و.
د لبنان دولتي خبري اژانس ویلي چې برید یو موټرسایکل او یو موټر په نښه کړی او دوه نور کسان یې ټپیان کړي دي. د اسرائیلو پوځ ادعا کړې چې د حزب الله یو غړی یې وژلی، خو نور جزئیات یې نه دي ورکړي.
د لبنان لومړي وزیر نواف سلام دا برید جنوب ته د ستنېدونکو ملکي وګړو د ډارولو هڅه وبلله.
د پارلمان رئیس نبیه بري په یوه اعلامیه کې وویل چې په وژل شویو کې یو پلار او د هغه درې ماشومان شامل دي او مور یې ټپي شوې ده. هغه وویل چې دوی د امریکا تابعیت درلود.
اسرائیلو په دې اړه سمدستي کومه تبصره نه ده کړې.
د لبنان لومړي وزیر نواف سلام پر اېکس (ټویټر) ولیکل: "هغه څه چې وشول د ملکي وګړو پر وړاندې یو ښکاره جنایت دی او زموږ هغو خلکو ته د ډارولو یو پیغام دی چې جنوب کې خپلو کلیو ته ستنېږي."
لبنان د امریکا، سعودي عربستان او د حزب الله د کورنیو سیالانو تر فشار لاندې دی چې یاده ډله بې وسلې کړي.
حزب الله ویلي، په داسې حال کې چې اسرائیل پر لبنان خپلو هوايي بریدونو ته دوام ورکوي او د دغه هېواد په جنوب کې یې پراخې سیمې اشغال کړي، د بې وسلې کېدو په اړه خبرې کول به یوه جدي تېروتنه وي.
