د امریکا ولسمشر ډونالډ ټرمپ وویل چې د افغانستان او پاکستان ترمنځه ستونزه به حل کړي.
د امريکا ولسمشر وویل  "زه د جګړو په هوارولو او د سولې په راوستلو کې ښه يم"

د امريکا ولسمشر ډونالډ ټرمپ د يکشنبې په ورځ ژمنه وکړه چې د افغانستان او پاکستان ترمنځ وروستی تاوتريخوالی به هوار کړي، او ادعا يې وکړه چې دی د جګړو په هوارولو کې ماهر دی.

ټرمپ اسرائيل ته پر لاره په 'اېرفورس ون' الوتکه کې خبريالانو ته وويل: "دا به زما اتمه جګړه وي چې ما هواره کړې ده، او اورم چې اوس د پاکستان او افغانستان ترمنځ جګړه روانه ده."

هغه زياته کړه: "ما وويل چې زه به تر بېرته راستنېدو پورې انتظار کوم. زه يوه بله جګړه هم هواروم. ځکه زه د جګړو په هوارولو او د سولې په راوستلو کې ښه يم، او دا کار کول زما لپاره يو وياړ دی. ما د ميليونونو انسانانو ژوند ژغورلی، د ميليونونو انسانانو ژوند."

دواړو خواوو د يکشنبې په ورځ تاييد کړه چې د پاکستاني او افغان ځواکونو ترمنځ د شپې په نښتو کې لسګونه سرتېري وژل شوي، چې دا په ۲۰۲۱ کال کې د طالبانو له خوا د افغانستان تر بيا نيولو وروسته د دواړو خواوو ترمنځ تر ټولو خونړۍ نښتې دي.

دا وروستی تاوتريخوالی وروسته له هغه رامنځته شو چې د افغانستان حکومت ادعا وکړه چې پاکستاني پوځ د پنجشنبې په شپه د دغه هېواد له هوايي حريم څخه سرغړونه کړې او د پاکستان سره په پوله د پکتيکا ولايت په مرغه سيمه کې يې پر يوه بازار بمباري کړې ده.

د دوشنبې په ورځ، ټرمپ اسرائيل ته لاړ، چېرته چې تمه کېږي نوموړی به د اسرائيلي بنديانو له کورنيو سره وګوري او اسرائیل پارلمان ته به وينا وکړي.

هغه به وروسته د مصر شرم الشيخ ته لاړ شي، او  د شرم الشيخ د سولې په سرمشريزه کې به ګډون وکړي. پدې سرمشریزه کې به د نړۍ د څه باندې ۲۰ هیوادونو مشران ګډون وکړي.

د قاهرې په وينا، دغه سرمشريزه چې د ټرمپ او د مصر د ولسمشر عبدالفتاح السيسي په ګډه مشري جوړېږي، موخه يې "په غزه کې د جګړې پای ته رسول، منځني ختيځ ته د سولې او ثبات د راوستلو لپاره د هڅو پياوړي کول او د سيمه‌ييز امنيت او ثبات د نوي پړاو پيلول" دي.